نازیہ اور زوہیب حسن کے مشہور میوزک البم سے رتن ٹاٹا کا کیا تعلق تھا؟

پاکستان کی معروف گلوکارہ نازیہ حسن کے بھائی گلوکار  زوہیب حسن نے معروف بھارتی صنعت کار  رتن ٹاٹا کے  انتقال پر ان سے جڑی یادیں سوشل میڈیا پر شیئر کی ہیں۔

فیس بک پوسٹ میں زوہیب حسن نے پرانی یادوں کا تذکرہ کرتے ہوئے بتایا کہ ایک دن ان کی والدہ نے بتایا کہ مسٹر رتن نامی ایک صاحب کی فون کال ہے جو  آپ دونوں ( نازیہ اور زوہیب) سے بات کرنا چاہتے ہیں۔

زوہیب نے بتایا کہ نازیہ سے فون پر بات کرتے ہوئے انہوں نے بتایا کہ وہ رتن بات کر رہے ہیں اور ایک میوزک کمپنی شروع کرنا چاہتے ہیں اور ان کی خواہش ہے کہ آپ دونوں ہماری کمپنی کے لیے ایک البم ریکارڈ کروائیں۔

زوہیب حسن کے مطابق نازیہ نے والدہ سے اس بارے میں پوچھا تو انہوں نے جمعےکو آنے کو کہا جس پر نازیہ نے انہیں کہا کہ آپ  جمعےکو  ہمارے گھر  ویمبلڈن (انگلینڈ)  آسکتے ہیں۔

معروف بھارتی بزنس مین رتن ٹاٹا کی موت سے 2 روز قبل کی گئی آخری انسٹاگرام پوسٹ وائرل

رتن ٹاٹا بھارت کے صنعتی شعبے کی ایک جانی مانی شخصیت تھے، وہ 1991 میں گاڑیوں اور اسٹیل کی صنعت سے منسلک ٹاٹا گروپ کے چیئرمین بنے اور 2012 تک اس منصب پر فائز رہے

گلوکار کے مطابق جمعے کے روز  ایک  دراز قد اور عمدہ لباس میں ملبوس شخص ہمارے گھر آیا، جس کا لہجہ انتہائی نرم اور مسکراہٹ سے بھرپور تھا۔

زوہیب  کا کہنا تھا کہ ان کی باتوں نے ہمیں بہت متاثر کیا،  ہمیں ان کے بارے میں نہیں معلوم تھا اور نہ انہوں نے اپنے بارے میں زیادہ کچھ بتایا، صرف اتنا کہا کہ اگر آپ لوگ راضی ہیں تو ہم البم کی تیاری پر کام کرتے ہیں، معاہدے کے لیے اپنے والدین اور  وکیل سے مشورہ کرنا، اگر کسی چیز پر اختلاف ہو تو  براہ راست مجھ سے رابطہ کرنا۔

زوہیب حسن کے مطابق اس کے بعد پھر جو ہوا وہ تاریخ کا حصہ ہے،  ہم نے ینگ ترنگ البم تیار کیا جس میں  ممکنہ طور پر بھارت اور جنوبی ایشیا کی  پہلی میوزک ویڈیوز شامل تھیں۔ اس کے بعد بھارتی ٹیلی ویژن نے وہ  میوزک ویڈیوز نشر کیں تو اس نے ڈسکو دیوانے البم کو بھی پیچھے چھوڑ دیا۔اس  کے بعد ہماری ممبئی کے تاج ہوٹل میں رتن ٹاٹا سے ملاقات  ہوئی  تو ہمیں پتہ چلا کہ  یہ عظیم آدمی کون تھا۔ تب تک ہمیں ان کے بارے میں کچھ نہیں معلوم تھا۔

بھارتی صنعت کار رتن ٹاٹا 86 برس کی عمر میں انتقال کرگئے

رتن ٹاٹا ممبئی کے ایک اسپتال میں انتہائی نگہداشت کے وارڈ میں داخل تھے۔

زوہیب حسن نے مزید بتایا کہ البم کی لانچ کے بعد انہوں نے نازیہ اور مجھے اپنےگھر کھانے  پر مدعو کیا،  ہمیں لگتا تھا کہ وہ  ایک محل میں رہتے ہوں گے لیکن جب ہم ان کےگھر پہنچے تو اس بات پر حیران ہوئےکہ بھارت کے سب سے بڑے صنعت کار کا رہائشی مکان اتنا سادہ تھا، ایک چھوٹا 2 بیڈ کا فلیٹ تھا۔ کھانا بھی سادہ تھا جسے آج بھی میں کبھی نہیں بھول سکتا۔

زوہیب  حسن کے مطابق مسٹر ٹاٹا اس بات کی زندہ مثال تھے کہ کوئی عظیم کاروباری شخص ہونے کے ساتھ ساتھ اچھا انسان بھی ہوسکتا ہے، ان کی کمی ہمیشہ محسوس کی جائے گی۔