کسی ملک کی فوج کو ختم کردیا تو ان ممالک کے حالات ہم نے دیکھے ہیں: مصطفیٰ کمال

متحدہ قومی موومنٹ پاکستان کے رہنما مصطفیٰ کمال کا کہنا ہے کہ ملک ہےتو ہماری سیاست ہے، جمہوریت ہے، کسی ملک کی فوج کو ختم کردیا تو ان ممالک کے حالات ہم نے دیکھے ہیں۔

کراچی میں پریس کانفرنس کرتے ہوئے مصطفیٰ کمال نے کہا کہ پی ٹی آئی نے 15 اکتوبر کو ڈی چوک پر احتجاج کا اعلان کیا ہے، سیاست سے اختلاف نہیں، احتجاج سیاست کا حصہ ہے لیکن ہماری سیاست اور شکایات ملک کے وقار اور سالمیت سے اوپر نہیں ہیں۔

انہوں نے کہا کہ پاکستان کا معاشی مسئلہ کسی سے چھپا ہوا نہیں ہے، حکومت اور ریاستی ادارے معاشی حالات بہتر بنانے کے لیے کام کر رہے ہیں، پی ٹی آئی کا 15 اکتوبر کے احتجاج کا اعلان ملک کے مفاد میں نہیں۔

ایم کیو ایم نےآئینی ترمیم کی حمایت کیلئے حکومت کو اپنا مطالبہ پیش کردیا

اس سے پہلے ایم کیوایم کے رہنما فاروق ستار نے کہا تھا آئینی ترمیم کسی اصول پر نہیں بلکہ سیاسی مفادات کی بنیاد پر ہو رہی ہے

رہنما ایم کیو ایم نے کہا کہ فلسطینیوں اور کشمیریوں کے لیے پاکستان ہی آخری امید ہے، پی ٹی آئی پر اینٹی اسٹیٹ ہونے کا الزام لگتاہے، 15 اکتوبرکواحتجاج کی کال سے اس الزام کوتقویت ملتی ہے، پی ٹی آئی کو سیاسی جماعت کی طرح عمل کرنا چاہیے ورنہ وہ اکیلے رہ جائیں گے، ان کے جو لوگ باہر ہیں انہیں سمجھائیں اس طرح کرنے سے کچھ نہیں ہوگا۔

انہوں نے مزید کہا کہ تحریک انصاف کے لوگوں کو کہہ رہے ہیں کہ نارمل سیاست کریں، پی ٹی آئی ایک مقبول جماعت ہے اس میں دو رائے نہیں،  تحریک انصاف سے کہتا ہوں اپنی احتجاج کی کال واپس لیں، ہماری پی ٹی آئی سے کوئی لڑائی نہیں ،ہم دروازہ کسی کے لیے بند نہیں کرتے۔