26 اکتوبر ، 2024 
پارٹی سے نکالنے کی باتوں سے سروکار نہیں، بانی پی ٹی آئی کا لیگل ایڈوائزر ہوں،: فیصل چوہدری
26 اکتوبر ، 2024
پاکستان تحریک انصاف کے رہنما اور وکیل فیصل چوہدری نے کہا ہے کہ میں بانی پی ٹی آئی کا لیگل ایڈوائزر ہوں، مجھے پارٹی سے نکالنے کی باتوں سے کوئی سروکار نہیں ہے۔
جیو نیوز کے پروگرام آج شاہزیب خانزادہ کے ساتھ میں بات چیت کرتے ہوئے انہوں نے کہا کہ میں نے بانی پی ٹی آئی کو صاف بتادیا تھاکہ ڈی چوک پراحتجاج میں پارٹی لیڈرشپ غائب ہوگئی تھی اور کارکن بے یار و مددگار تھے۔
انہوں نے کہا کہ میں بانی پی ٹی آئی کو دیکھ کر حیران رہ گیا کہ انہیں کیسے حالات میں رکھا گیا ہے۔
فیصل چوہدری نے کہا کہ انہوں نے بانی پی ٹی آئی کو انتظار پنجوتھا کی گمشدگی کے بارے میں بھی بتا دیا ہے، جو میں نے باہر دیکھا وہ اندر جا کر بتا دیا اور جو اندر دیکھا وہ باہر آ کر بتایا، آئندہ بھی یہی کروں گا۔
خیال رہے کہ پاکستان تحریک انصاف نے سابق وفاقی وزیر فواد چوہدری کے بھائی فیصل چوہدری کو لیگل ٹیم سے الگ کردیا۔
پی ٹی آئی ذرائع کا کہنا ہے کہ فیصل چوہدری کو پی ٹی آئی وکلا کے واٹس ایپ گروپس سے بھی نکال دیا گیا۔
فیصل چوہدری اور انتظارپنجوتھا چند رہنماؤں کی پارٹی میں واپسی کیلئے کوششیں کر رہے تھے، معلوم ہوا ہے کہ فیصل چوہدری نے ڈی چوک احتجاج سے متعلق بانی پی ٹی آئی کو بعض رہنماؤں کی شکایت لگائی تھی۔
فیصل چوہدری اور انتظار پنجوتھا پر یہ بھی الزام ہے کہ وہ پارٹی قیادت سے مشاورت کے بغیر بعض ملاقاتوں پر کام کر رہے تھے۔
