کھیل

آئی پی ایل: کوہلی، روہت اور پانڈیا کو فرنچائزز نے کتنے کروڑ میں ریٹین کیا؟

01 نومبر ، 2024

آئی پی ایل: کوہلی، روہت اور پانڈیا کو فرنچائزز نے کتنے کروڑ میں ریٹین کیا؟ — 10 فرنچائزز کی برقرار رکھے جانے والے کھلاڑیوں کی فہرست میں بھارت کے اسٹار کرکٹر ویرات کوہلی، روہت شرما اور ہاردک پانڈیا کا نام بھی شامل ہیں/ فائل فوٹو

انڈین پریمیئر لیگ ( آئی پی ایل ) کا میگا ایونٹ تو اگلے برس مارچ میں شروع ہونا ہے لیکن اس سے قبل فرنچائزز کھلاڑیوں کے انتخاب کیلئے کوشاں ہیں۔

بھارتی میڈیا رپورٹس کے مطابق آئی پی ایل 2025 کے کھلاڑیوں کیلئے کی جانیوالی بڑی نیلامی رواں ماہ یا اگلے ماہ دسمبر تک متوقع ہے لیکن گزشتہ روز آئی پی ایل کی تمام فرنچائزز نے اپنے برقرار ((retained ) رکھے جانیوالے کھلاڑیوں کی فہرست جاری کردی ہے۔

10 فرنچائزز کی برقرار رکھے جانے والے کھلاڑیوں کی فہرست میں بھارت کے اسٹار کرکٹر ویرات کوہلی، روہت شرما اور ہاردک پانڈیا کا نام بھی شامل ہیں۔

یہ بھی پڑھیں

بھارتی میڈیا کا دعویٰ ہےکہ آئی پی ایل کی فرنچائز ممبئی انڈینز نے ہاردک پانڈیا کو ٹیم میں برقرار رکھنے کیلئے 16 کروڑ 35 لاکھ روپے اور روہت شرما کو برقرار رکھنے کیلئے 16 کروڑ 30 لاکھ روپے خرچ کرے گی جب کہ ممبئی انڈینز کے کپتان اس بار بھی ہاردک پانڈیا ہی ہوں گے۔

دوسری جانب آئی پی ایل کی فرنچائز رائل چیلنجرز بنگلور (RCB) کے برقرار رکھے جانے کھلاڑیوں کی فہرست میں اسٹار کرکٹر ویرات کوہلی شامل ہیں جن کیلئے فرنچائز 21کروڑ روپے کی خطیر رقم خرچ کرے گی۔

واضح رہے کہ ویرات کوہلی 2008 میں آئی پی ایل کے آغاز کے بعد سے ہی رائل چیلنجرز بنگلور سے وابستہ ہیں۔

حال ہی میں بی سی سی آئی نے فرنچائزز کیلئے کھلاڑیوں کو برقرار رکھنے کے حوالے سے نئے قواعد جاری کیے ہیں جس کے تحت ایک فرنچائز زیادہ سے زیادہ 6 کھلاڑیوں کو ہی برقرار رکھ سکتی ہے۔