کاروبار

رواں مالی سال کے ابتدائی 4 ماہ کے دوران تجارتی خسارے میں کمی آگئی

01 نومبر ، 2024

رواں مالی سال کے ابتدائی4 ماہ کے دوران تجارتی خسارے میں کمی آگئی۔

اداراہ شماریات کے مطابق رواں مالی سال کے ابتدائی 4 ماہ میں تجارتی خسارے میں 5.19 فیصد کمی آئی اور اس دوران تجارتی خسارہ 6 ارب97 کروڑ ڈالر سے زائد رہا۔

گزشتہ سال اسی عرصے کے دوران تجارتی خسارہ 7 ارب39 کروڑ ڈالر تھا۔

اداراہ شماریات کے جاری کردہ اعداد و شمار کے مطابق اکتوبر میں تجارتی خسارہ 31.09 فیصد کمی سے ایک ارب 49 کروڑ 80 لاکھ ڈالر رہا، گزشتہ سال اکتوبر میں تجارتی خسارہ 2 ارب 17 کروڑ ڈالر سے زائد تھا۔

ادارہ شماریات کے مطابق ستمبرکے مقابلے میں اکتوبر میں تجارتی خسارے میں19.69 فیصد کمی ریکارڈ کی گئی، رواں مالی سال کے پہلے 4 ماہ برآمدات 13.45 فیصد اضافے سے 10 ارب88 کروڑ ڈالر رہیں، گزشتہ مالی سال کے پہلے 4 ماہ میں برآمدات کا حجم 9 ارب 59 کروڑ ڈالرتھا۔

اکتوبر میں برآمدات 10.64 فیصد اضافے سے 2 ارب97 کروڑ ڈالر رہیں، گزشتہ مالی سال اکتوبر میں برآمدات کا حجم 2 ارب 69 کروڑ ڈالر تھا۔

ستمبرکی نسبت اکتوبرمیں برآمدات میں 4.90 فیصد اضافہ ہوا، ستمبر میں برآمدات کا حجم 2 ارب 83 کروڑ 60 لاکھ ڈالر تھا۔

رواں مالی سال کے پہلے4 ماہ میں مجموعی درآمدات5.17 فیصد اضافےسے17 ارب85 کروڑ ڈالر رہیں جبکہ گزشتہ مالی سال اسی عرصے میں درآمدات کاحجم 16 ارب 98 کروڑ ڈالر تھا۔

اکتوبر میں سالانہ بنیادوں پر درآمدات 8.02 فیصد کمی سے 4 ارب47 کروڑ ڈالر رہیں جبکہ گزشتہ سال اکتوبر میں درآمدات کا حجم 4 ارب 86 کروڑ ڈالر تھا۔

ادارہ شماریات کے مطابق ستمبرکے مقابلے اکتوبر میں درآمدات میں 3.93 فیصد کمی ریکارڈ کی گئی۔