دنیاکی میجر میرا تھونز میں شامل نیویارک میرا تھون کا انعقاد، درجنوں پاکستانی رنرز کی شرکت

دنیا کی اہم ترین میراتھونز میں شمار  نیو یارک میراتھون کل منعقد ہوگی جس میں دنیا بھر سے50 ہزار سے زائد رنرز حصہ لیں گے۔

 نیویارک میں منعقد کی جانے والی میراتھون میں پاکستان سے تعلق رکھنے والے 36 کے قریب رنرز بھی شرکت کریں گے جن کی نظریں ایونٹ میں اپنا بہترین کھیل پیش کرنے کے ساتھ ساتھ پاکستان کا پرچم سربلند کرنے پر مرکوز ہوگی۔

نیو یارک میراتھون سے قبل شرکا نے روایتی’پیریڈ آف نیشنز‘ میں شرکت کی،  افتتاحی تقریب کے دوران ہونے والی اس پیریڈ میں شعیب نظامی نے پاکستان کا پرچم تھاما اور ایتھلیٹس کے ساتھ ٹریک پر آئے ،  اس موقع پر بعض پاکستانی رنرز نے فلسطینیوں کے ساتھ اظہار یکجہتی کیلئے فلسطین کا جھنڈا بھی تھاما ہوا تھا ۔ 

 نیو یارک میراتھون دنیا کی 6 میجر میراتھونز میں سے ایک

نیو یارک میراتھون دنیا کی 6 میجر میراتھونز میں سے ایک ہے اور اس میں حصہ لینا ہر رنر کیلئے  باعث فخر ہوتا ہے۔

اس میراتھون میں شرکت کرنے والے پاکستانی اور پاکستانی نژاد رنرز میں ڈاکٹر سلمان خان، پریم کمار، جمال خان، بابر غیاث، شعیب نظامی، محمد فصیح الصالح، عتیق الحسن، مسعود مہدی، شاہد نواز ، شازیہ نواز ، خولہ احمد ، روفی شہزادہ، شارق صمد، یاسر سلیمان میمن، یاور صدیقی، رحمان اظہر، عمار ممتاز، عباس نقوی، راجہ عارف، ڈاکٹر رضوان خواجہ، جنید میمن، جہانزیب خان، خالد شیخ، عبد الکریم، ڈاکٹر جہانزیب مغل، کوکب سرور، نوشیروان علی، ڈاکٹر احمد زبیر، ماہین شیخ، سید فہیم، احمد عزیر، انعم عزیر، دانش الٰہی، فیصل شفیع، سلمان چوہدری  اور قمر ضیا شامل ہیں۔

میراتھون میں شرکت کرنیوالے پاکستان کے بہترین رنرز کی گفتگو

پاکستان کے بہترین رنرز میں شامل شعیب نظامی کا  نیو یارک میراتھون کے حوالے سے کہناتھا  کہ یہ دنیا کی بڑی میراتھونز میں سے ایک ہے اور اس کے ٹریک کی چڑھائی اسے مزید چیلنجنگ بناتی ہے۔

شعیب نظامی کے مطابق وہ برلن، شکاگو اور ٹوکیو میراتھونز میں شرکت کرچکے ہیں، جو زیادہ تر ہموار سطح پر منعقد ہوتی ہیں لیکن نیو یارک میراتھون کا مختلف تجربہ بہت دلچسپ ہوگا،  اگرچہ نیو یارک کا ٹریک ان کیلئے مشکل ہو سکتا ہے تاہم ان کا مقصد اپنی بہترین کارکردگی پیش کرنا اور اپنی پرسنل بیسٹ کو حاصل کرنا ہے۔

شعیب نظامی نے  پاکستانی رننگ کے فروغ اور پاکستان میں میراتھون کے انعقاد پر بھی فخر کا اظہار کیا اور بتایا کہ آنے والی کراچی میراتھون پہلی بار ورلڈ ایتھلیٹکس لیبل ریس اور کوالیفائنگ ریس ہوگی جو پاکستان کیلئے ایک اعزاز کی بات ہے۔

ایک اور پاکستانی رنر کوکب سرور، جو نیو یارک میراتھون میں اپنے چوتھے ورلڈ میجر اسٹار کے  حصول پر نظر جمائیں گی اس کے علاوہ کوکب سرور سائیکلنگ کے انٹرنیشنل مقابلوں میں بھی پاکستان کی نمائندگی کر چکی ہی۔

 ان کا کہنا ہے کہ  وہ اس چیلنجنگ ٹریک کے بارے میں نہایت ہی پرجوش ہیں،  نیو یارک میراتھون کے بعد ان کا اگلا ہدف ٹوکیو میراتھون میں شرکت اور پانچویں اسٹار حاصل کرنا ہے،