06 نومبر ، 2024 
امریکی صدارتی انتخابات: کملا ہیرس نے شکست تسلیم کرلی، ٹرمپ کو مبارکباد کا فون
06 نومبر ، 2024
امریکی صدارتی انتخابات میں ڈیموکریٹک پارٹی کی صدارتی امیدوار کملا ہیرس نے اپنی شکست تسلیم کرتے ہوئے ریپبلکن امیدوار ڈونلڈ ٹرمپ کو فون کال کی اور صدراتی الیکشن میں جیت پر انہیں مبارک باد دی۔
امریکی خبر ایجنسی کے مطابق نائب صدر کملا ہیرس نے نومنتخب صدر ڈونلڈ ٹرمپ کے ساتھ اختیارات کی پرامن منتقلی پر بھی بات کی۔
خیال رہے کہ امریکی صدر کے انتخاب کے لیے تمام ریاستوں میں ہونے والی پولنگ کے نتائج کے مطابق ڈونلڈ ٹرمپ نے انتخابی معرکہ جیت لیا ہے اور 47 ویں امریکی صدر منتخب ہوگئے ہیں۔
امریکی صدارتی انتخاب میں538 میں سے اب تک ڈونلڈ ٹرمپ نے 292 اور کملا ہیرس نے 226 الیکٹورل ووٹ حاصل کیے ہیں۔
امریکی صدارتی انتخابات میں ڈونلڈ ٹرمپ نے 7 کروڑ 18 لاکھ 62 ہزار 502 ووٹ حاصل کیے جبکہ ان کے مد مقابل امیدوار کملا ہیرس نے 6 کروڑ 69 لاکھ 92 ہزار 830 ووٹ حاصل کیے۔
