10 نومبر ، 2024 
پاکستان کا اولمپکس سمیت کھیلوں کے ہر فورم پر بھارت کو چیلنج کرنے کا فیصلہ
10 نومبر ، 2024
چیمپئنز ٹرافی کے لیے بھارتی کرکٹ ٹیم کے پاکستان آنے سے انکار کی خبروں کے بعد پاکستان نے کھیلوں کے ہر فورم پر بھارت کو چیلنج کرنے کا فیصلہ کرلیا۔
ذرائع کے مطابق پاکستان کی جانب سے بھارت کی اولمپکس بڈ کی بھی مخالفت کی جائے گی، بھارت 2036 میں اولمپکس کی میزبانی کا خواہشمند ہے۔
حکومتی ذرائع کا کہنا ہے کہ پاکستان نے کھیلوں میں بھارتی رویے پر آئی او سی کو خط لکھنے کا بھی فیصلہ کیا ہے۔
ذرائع کا کہنا ہے کہ بھارت نے متعدد مرتبہ کھیلوں میں سیاست کو ملوث کیا، چیمپئنز ٹرافی کے معاملے پر حکومت پاکستان نے بھی سخت مؤقف اختیار کیا ہے۔
خیال رہے کہ انٹرنیشنل کرکٹ کونسل (آئی سی سی) نے پاکستان کرکٹ بورڈ (پی سی بی) کو بھارت کے پاکستان نہ آکر کھیلنے سے متعلق آگاہ کردیا ہے۔
ذرائع کے مطابق پی سی بی نے حکومت پاکستان کے ساتھ رابطہ کیا اور بھارت کے نہ آنے سے متعلق آگاہ کردیا۔
