10 نومبر ، 2024 
سکیورٹی فورسز نے پاک افغان بارڈر سے خوارج کی دراندازی کی کوشش ناکام بنادی، 2 دہشتگرد ہلاک
10 نومبر ، 2024
شمالی وزیر رستان کے مقام سپن وام میں سکیورٹی فورسز نےخوارجیوں کے ایک گروہ کی پاک افغان بارڈر سے دراندازی کی کوشش ناکام بنادی۔
پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے شمالی وزیرستان میں 2 کارروائیاں کیں اور فائرنگ کے تبادلے میں 4 خوارج مارے گئے۔
آئی ایس پی آر نے بتایاکہ سکیورٹی فورسز نے اسپن وام میں خفیہ اطلاعات پرآپریشن کیا اور فائرنگ کے شدید تبادلے میں 2 خوارج مارےگئے۔
آئی ایس پی آر کا کہنا ہے کہ سکیورٹی فورسز نے اسپن وام میں پاک افغان بارڈر سے خوارجیوں کی دراندازی کی کوشش ناکام بنا دی اور فائرنگ کے تبادلے میں 2 خوارج ہلاک اور 2 زخمی ہوگئے۔
آئی ایس پی آر کے مطابق سکیورٹی فورسز کا علاقے میں کلیئرنس آپریشن جاری ہے اور سکیورٹی فورسز سرحدیں محفوظ بنانے اور دہشت گردی کے خاتمے کےلیے پُر عزم ہیں۔
خیال رہے کہ اس سے قبل بھی سکیورٹی فورسز نے اسپن وام میں انٹیلی جنس معلومات پر آپریشن کیا اور کارروائی کے دوران 6 خوارج ہلاک اور چھ زخمی بھی ہوئے۔
