11 نومبر ، 2024 
چیمپئنز ٹرافی: حفیظ حکومت اور بورڈ کی جانب سے بھارت کیلئے منہ توڑ جواب کے منتظر
11 نومبر ، 2024
بھارتی کرکٹ بورڈ کی جانب سے چیمپئنز ٹرافی کیلئے ٹیم پاکستان بھیجنے سے انکار کے معاملے پر سابق کپتان محمد حفیظ پی سی بی کے منہ توڑ جواب کے منتظر ہیں۔
کرکٹ ویب سائٹ کی رپورٹ کے مطابق بی سی سی آئی کی جانب سے آئی سی سی کو آگاہ کیا جاچکا ہے کہ بھارتی ٹیم چیمپئنز ٹرافی 2025 میں شرکت کے لیے پاکستان نہیں جائےگی، اس نئی پیشرفت کے بعد آئی سی سی اور پاکستان کرکٹ بورڈ کو متبادل پلان پرکام کرنا ہوگا اور ہائبرڈ ماڈل کے تحت پاکستان اور یو اے ای میں میچز کرانا ہوں گے۔
دوسری جانب چیمپئنز ٹرافی کے لیے بھارت کے پاکستان نہ آنے کے معاملے پر پاکستان کرکٹ بورڈ نے بھی قانونی مشاورت مکمل کرلی ہے جب کہ سابق کپتان محمد حفیظ پی سی بی کے منہ توڑ جواب کے منتظر ہیں۔
اس حوالے سے ایکس پر اپنی رائے کا اظہار کرتے ہوئے محمد حفیظ نے کہا کہ دن کا خواب تھا کہ بھارت چیمپئنز ٹرافی کے لیے پاکستان آ ئے گا، پاکستان محفوظ ملک ہے اور ایونٹ کی میزبانی کیلئے تیار ہے۔
حفیظ نے کہا کہ پاکستان کرکٹ کھیلنے والے تمام ممالک کی میزبانی کررہا ہے لیکن بھارت کے لیے محفوظ نہیں ہے، حکومت اور پی سی بی کی جانب سے مضبوط اور حیران کن جواب کے منتظر ہیں۔
خیال رہےکہ آئی سی سی چیمپئنز ٹرافی آئندہ سال 19 فروری سے 9 مارچ تک پاکستان میں شیڈول ہے جس میں 8 ٹیموں نے شرکت کرنا ہے۔
