14 نومبر ، 2024 
احتجاج کا مقصد بانی پی ٹی آئی سمیت کارکنان کی رہائی اور آئین و قانون کی بالادستی ہے: عمر ایوب
14 نومبر ، 2024
قومی اسمبلی میں اپوزیشن لیڈر عمر ایوب نے کہا ہے کہ 24 نومبر کے احتجاج کی کال کا مقصد بانی پی ٹی آئی سمیت تحریک کے بے گناہ کارکنوں کی رہائی اور آئین و قانون کی بالادستی ہے۔
جیو نیوز کے پروگرام کیپیٹل ٹاک میں گفتگو کرتے ہوئے عمر ایوب نے کہا کہ ان پر 100 سے زائد مقدمات قائم ہوچکے ہیں جن میں فارینرز ایکٹ کے مقدمات بھی شامل ہیں۔
عمر ایوب نے کہا کہ دو ماہ سے بانی تحریک انصاف سے ملاقات نہیں ہونے دی جارہی ہے کہا جاتا ہے کہ بانی تحریک انصاف سے سیاسی گفتگو نہیں کرسکتے۔
چیمپیئز ٹرافی میں بھارتی ٹیم کی شرکت کے معاملے پر پوچھے گئے سوال کے جواب میں انہوں نے کہا کہ اگر بھارتی کرکٹ ٹیم پاکستان میں چیمپئنز ٹرافی کھیلنے نہیں آتی تو بھارتی ٹیم کے بغیر ہی چیمپئنز ٹرافی کے میچز ہونے چاہئیں۔
خیال رہے کہ بانی تحریک انصاف نے اعلان کیا ہے کہ پی ٹی آئی کی جانب سے 24 نومبر کو اسلام آباد میں احتجاج کی کال دی گئی ہے۔
اڈیالہ جیل کے باہر میڈیا سے گفتگو میں بانی پی ٹی آئی کی بہن علیمہ خان نے بتایا کہ بانی پی ٹی آئی کا پیغام ہے کہ 24 نومبر کو اسلام آباد کی طرف نکلنا ہے، پی ٹی آئی کی قیادت کو ہدایات دے دی گئی ہیں کہ کیا اور کس طرح کرنا ہے۔
وزیراعلیٰ خیبرپختونخوا علی امین گنڈا پور کا کہنا تھا کہ احتجاج کی تیاریاں مکمل ہیں، اِس بار مطالبات کی منظوری تک واپس نہیں آئیں گے۔
