17 نومبر ، 2024 
بشریٰ بی بی 24 نومبر کو احتجاج کی تیاریوں کیلئے متحرک ہوگئیں
17 نومبر ، 2024
پاکستان تحریک انصاف کے 24 نومبر کے احتجاج کی تیاریوں کے لیے بانی پی ٹی آئی عمران خان کی اہلیہ بشریٰ بی بی متحرک ہوگئیں۔
وزیراعلیٰ ہاؤس پشاور میں پی ٹی آئی ہزارہ ،ملاکنڈ اور بلوچستان کے عہدیداروں کے اجلاس ہوئے ۔
ذرائع کے مطابق تمام اجلاسوں میں اہلیہ بانی پی ٹی آئی بشریٰ بی بی نے بات چیت کی۔
ذرائع کا کہنا ہے کہ بشریٰ بی بی نےبانی پی ٹی آئی کا پیغام پی ٹی آئی عہدیداروں تک پہنچایا اور کہا کہ عمران خان کی رہائی کیلئے جہدو جہد تیز کی جائے۔
اس سے قبل پی ٹی آئی ذرائع نے بتایا تھا کہ بشریٰ بی بی نے 24نومبر کو احتجاج میں ہر حلقے سے ایم این اے کو 10ہزار اور ہر ایم پی اے کو 5ہزار افراد ساتھ لانے کی ہدایت کی ہے۔
دوسری جانب خیبر پختونخوا حکومت کے ترجمان بیرسٹر سیف نے کہا ہے کہ بانی پی ٹی آئی کی اہلیہ بشریٰ بی بی نے کسی اجلاس میں شرکت نہیں کی،صرف بانی کا پیغام پارٹی قائدین کوبتایا۔
ادھر 24 نومبر احتجاج سے قبل پاکستان تحریک انصاف میں اختلافات سامنے آگئے۔
پی ٹی آئی پشاور سٹی کے جنرل سیکرٹری تقدیرعلی اور سینئر نائب صدر ملک اسلم نے پارٹی عہدوں سے استعفیٰ دے دیا۔
یاد رہے کہ پاکستان تحریک انصاف نے 24 نومبر کو اسلام آباد کی جانب مارچ کی کال دے رکھی ہے اور اس حوالے سے وزیراعلیٰ خیبر پختونخوا علی امین گنڈا پور کا کہنا تھا کہ اس بار سر سے کفن باندھ کر نکلیں گے اور مطالبات کی منظوری تک واپس نہیں لوٹیں گے۔
