سائنس و ٹیکنالوجی

اب آپ یوٹیوب شارٹس کے لیے اے آئی ویڈیو بیک گراؤنڈ استعمال کرسکتے ہیں

ویب ڈیسک

24 نومبر ، 2024

اب آپ یوٹیوب شارٹس کے لیے اے آئی ویڈیو بیک گراؤنڈ استعمال کرسکتے ہیں — کمپنی کی جانب سے اس فیچر کا اعلان کیا گیا / فوٹو بشکریہ یوٹیوب

اگر آپ یوٹیوب شارٹس بنانا پسند کرتے ہیں تو اب آرٹی فیشل انٹیلی جنس (اے آئی) ٹیکنالوجی سے یہ کام زیادہ آسان ہو جائے گا۔

کمپنی کی جانب سے ڈریم اسکرین نامی فیچر کا اعلان کیا گیا ہے۔

اس فیچر سے صارفین شارٹس ویڈیوز میں اے آئی سے تیار کردہ ویڈیو بیک گراؤنڈ استعمال کرسکیں گے۔

واضح رہے کہ یہ کوئی نیا فیچر نہیں مگر اب تک اس فیچر سے صرف امیج بیک گراؤنڈ ہی تیار کیے جاسکتے تھے۔

یہ بھی پڑھیں

ایسا گوگل کے اے آئی ویڈیو جنریشن ماڈل ویو (Veo) سے ممکن ہوگا جو 1080p ریزولوشن ویڈیو متعدد سنیماٹک اسٹائلز میں تیار کرنے کی صلاحیت رکھتا ہے۔

صارفین اس فیچر کو استعمال کرکے ٹیکسٹ پروموٹ کے ذریعے اے آئی ویڈیو بیک گراؤنڈز تیار کرسکیں گے۔

اس فیچر تک رسائی کے لیے آپ کو شارٹس کیمرے میں جانا ہوگا اور وہاں گرین اسکرین آئیکون اور پھر ڈریم اسکرین کو سلیکٹ کرنا ہوگا۔

وہاں آپ اپنی تحریری ہدایت ٹائپ کرسکتے ہیں اور جیسا پس منظر آپ کے ذہن میں ہو اس کے مطابق تحریر لکھنی ہوگی۔

اس کے بعد اپنی پسند کے اسٹائل کا انتخاب کرکے Create پر کلک کرنا ہوگا۔

کمپنی نے بتایا کہ ڈریم اسکرین ٹول سے متعدد اقسام کے ویڈیو بیک گراؤنڈز تیار کیے جا سکتے ہیں اور جب آپ کسی اے آئی ویڈیو بیک گراؤنڈ کو انتخاب کریں گے تو وہ ویڈیو کا حصہ بن جائے گا۔

کمپنی کے مطابق مستقبل میں ڈریم اسکرین کے ذریعے 6 سیکنڈ طویل ویڈیو تیار کرنے کی سہولت بھی فراہم کی جائے گی۔

یہ نیا فیچر فی الحال امریکا، کینیڈا، آسٹریلیا اور نیوزی لینڈ میں صارفین کے لیے متعارف کرایا گیا ہے۔