قذافی اسٹیڈیم کے بعد نیشنل اسٹیڈیم کراچی کی بھی حالت بدلنے لگی

کراچی: قذافی اسٹیڈیم کے بعد نیشنل بینک اسٹیڈیم کراچی کی بھی حالت بدلنے لگی۔

نیشنل اسٹیڈیم کراچی کی اپ گریڈیشن کا کام تیز ی سے جاری ہے اور  نئی بلڈنگ کا کام آخری مرحلے میں ہے جب کہ اسٹیل اسٹرکچر پر مشتمل جدید طرز کی خوبصورت ترین عمارت کے فلورز کی فنشنگ بھی جاری ہے۔

چیئرمین پی سی بی کا نیشنل اسٹیڈیم کا دورہ 

چیئرمین پاکستان کرکٹ بورڈ محسن نقوی نے  نیشنل اسٹیڈیم کراچی کا تفصیلی دورہ کیا اور  نئی عمارت کے چاروں فلورز کا معائنہ بھی کیا۔

چیئرمین پی سی بی کے دورے کے دوران  ایف ڈبلیو او کے حکام نے اپ گریڈیشن پروجیکٹ پر ہونے والی پیش رفت کے بارے میں انہیں بریفنگ دی، اس موقع پر  ڈائریکٹر انفراسٹرکچر پی سی بی، منیجر نیشنل بینک کرکٹ اسٹیڈیم اور ایف ڈبلیو او کے اعلیٰ حکام بھی موجود تھے۔

دورے کے دوران چیئرمین پی سی بی نے اپ گریڈیشن پروجیکٹ پر پیش رفت کا جائزہ لیتے ہوئے  فلورز کے فنشنگ کاموں کا مشاہدہ کیا۔

اس موقع پر محسن نقوی کا کہنا تھا کہ نیشنل بینک کرکٹ اسٹیڈیم میں پولز پر نئی ایل ڈی اے لائٹس لگائی جا رہی ہیں، شائقین کرکٹ تاریخ میں پہلی بار منفرد لیزر لائٹس شو سے بھی محظوظ ہو سکیں گے۔

چیئرمین پی سی بی نے نئی بلڈنگ میں انکلوژرز بنانے اور  شائقین کرکٹ کی سہولت کیلئے پارکنگ ایریا کو اسٹیڈیم کے قریب کرنے کی ہدایت کی ہے جب کہ محسن نقوی کی ہدایت پر دونوں اسکور اسکرینز کو اب نشستوں سے اونچائی پر نصب کیا جائے گا، اسکرینز اونچائی پر نصب ہونے سے شائقین کو میچ دیکھنے میں کسی قسم کی دقت کا سامنا نہیں کرنا پڑے گا۔

چیئرمین پی سی بی کا کہنا تھا کہ چیمپئنز ٹرافی ٹورنامنٹ کے انعقاد کے لیے تیاریاں مکمل ہیں، پاکستان کے ساتھ بیرون ممالک سے آنے والے شائقین کرکٹ اس بار پہلے سے زیادہ سہولتوں کے ساتھ میچ دیکھیں گے۔