09 دسمبر ، 2024 
ویڈیو: سرنگ سے راستے، پرآسائش کمرے اور جدید ترین سہولیات، بشار الاسد کا زیر زمین عالیشان محل
09 دسمبر ، 2024
حیات التحریر الشام کی فورسز کے ہاتھوں شکست کھا کر روس فرار ہونے والے سابق شامی صدر بشار الاسد کے عالیشان محلات کو ملانے والی جدید ترین سہولتوں سے آراستہ زیر زمین طویل سرنگ کی ویڈیو منظر عام پر آگئی۔
گزشتہ روز شامی اپوزیشن فورسز کی جانب سے دارالحکومت دمشق پر قبضے کے بعد سے بشار الاسد کے زیر استعمال عالیشان محلات اور لگژری گاڑیوں کی ویڈیوز اور تصاویر منظر عام پر آ رہی ہیں۔
اس کے علاوہ سوشل میڈیا پر شامی جیلوں سے رہا ہونے والے ان افراد کی ویڈیوز بھی موجود ہیں جو کئی دہائیوں سے قید تھے، رہائی پانے والوں میں خواتین اور بچوں کی بڑی تعداد بھی شامل ہے۔
تاحال یہ تو معلوم نہیں ہو سکا ہے کہ بشار الاسد فیملی کے ہمراہ روس فرار ہوتے وقت اپنے ساتھ کیا کچھ لیکر بھاگے لیکن ان کے زیر استعمال اشیا کو دیکھ کر شاہانہ طرز زندگی کا اندازہ لگایا جا سکتا ہے۔
اب بشار الاسد کے زیر استعمال جدید ترین سہولیات سے آراستہ خفیہ سرنگ کی ویڈیو سوشل میڈیا پلیٹ فارم پر گردش کر رہی ہے تاہم اس بات کی تصدیق نہیں ہو سکی ہے کہ آیا یہ بشار الاسد کے زیر استعمال سرنگ ہی ہے یا پھر کہیں اور کی ویڈیو ہے۔
سوشل میڈیا پر وائرل ویڈیو میں ایک شخص کو زیر زمین سرنگ کی موبائل فون سے ویڈیو بناتے دیکھا جا سکتا ہے، متعلقہ شخص سرنگ کے مختلف راستوں سے ہوتا ہوا گزر رہا ہے اور راہداریوں میں آنے والے پر آسائش کمرے، حمام اور دیگر مقامات کے بارے میں بھی بتا رہا ہے۔
