12 دسمبر ، 2024 
ملک کے بالائی علاقوں میں برفباری سے سردی میں اضافہ،کراچی میں بھی پارا 11 ڈگری تک گرگیا
12 دسمبر ، 2024
ملک کے بیشتر علاقوں میں موسم سرد اور خشک جبکہ پہاڑی علاقوں میں برف باری سے سردی کی شدت میں اضافہ ہوگیا۔
نیلم آزاد کشمیر کے بالائی علاقوں میں برف باری کا سلسلہ جاری ہے۔ سیاحتی مقامات جاگراں ویلی ، بالائی وادی نیلم، شاردہ،اڑنگ کیل، بالائی وادی گریس، ہلمت، تاؤبٹ،شونٹھر، سرگن میں بھی برف باری ہوئی۔
ادھر گلگت بلتستان کے بالائی علاقوں میں بھی برف باری ہوئی ، ضلع استور میں برف باری سے نظامِ زندگی متاثر ہے۔
خیبر پختونخوا میں بابوسرٹاپ، نانگا پربت اور بٹو گاہ میں برف باری سے سردی میں اضافہ ہوگیا۔
اس کے علاوہ لاہور سمیت پنجاب کے مختلف شہروں میں بھی شدید سردی ہے۔ بلوچستان میں کوئٹہ، قلات، چمن، قلعہ عبداللہ، پشین اور زیارت سمیت صوبے بھر میں شدید سردی سے پانی پائپوں میں جم گیا جبکہ کراچی میں بھی سردی ہے، پارا 11 ڈگری تک گرگیا۔
