01 جنوری ، 2025 
سالِ نو پر کراچی کے مختلف علاقوں میں ہوائی فائرنگ سے 29 افراد زخمی
01 جنوری ، 2025
کراچی،لاہور، اسلام آباد سمیت ملک بھر میں سال نو کا آغاز ہوگیا اور شہری بڑی تعداد میں جشن منانے سڑکوں پر نکل آئے۔
نئے سال کی آمد پر کراچی، اسلام آباد، روہڑی سمیت مختلف شہروں میں شاندار آتش بازی اور ہوائی فائرنگ بھی کی گئی۔
ریسکیو ذرائع کے مطابق کراچی کے مختلف علاقوں میں سال نوپر ہوائی فائرنگ سے 2خواتین سمیت29 افراد زخمی ہوگئے۔
ریسکیو ذرائع کا کہنا ہے کہ لیاقت آباد کے علاقوں میں 3 اور گلشن اقبال چورنگی کے قریب ایک شخص زخمی ہوا۔
اس کے علاوہ شاہ فیصل کالونی اور اورنگی ٹاؤن میں گولی لگنے سے خاتون سمیت 2 افراد زخمی ہوئے۔
پولیس نے بھی مختلف علاقوں میں ہوائی فائرنگ کرنے والوں کے خلاف کارروائیاں کرتے ہوئے 30 افراد کو گرفتار کرلیا۔
واضح رہے کہ کراچی پولیس نے عوام کو خبردار کرتے ہوئے کہا تھا کہ سال نو پر فائرنگ کرنے والوں پر اقدامِ قتل کا مقدمہ درج کیا جائے گا۔
