15 جنوری ، 2025 
آرمی چیف سے میٹنگ میں موجودگی پر بیرسٹر گوہر کیسےکہہ سکتے ہیں کہ وہ نہیں تھے: فیصل کنڈی
15 جنوری ، 2025
پشاور:گورنر خیبر پختونخوا فیصل کریم کنڈی نےکہا ہےکہ آرمی چیف سے ہماری میٹنگ میں بیرسٹرگوہر موجود تھے، دن دیہاڑے میٹنگ میں موجودگی پر یہ کیسےکہہ سکتے ہیں کہ میں نہیں تھا۔
نجی ٹی وی کے پروگرام میں گفتگو کرتے ہوئے فیصل کریم کنڈی کا کہنا تھا کہ بیرسٹر گوہر میٹنگ میں موجودگی کی تردید کر رہے ہیں تو اس کا ان سے پوچھیں۔
گورنر فیصل کنڈی سے سوال کیا گیا کہ کیا بیرسٹر گوہر کی آرمی چیف سے الگ ملاقات ہوئی تھی؟ اس پر انہوں نے کہا کہ آرمی چیف سے بیرسٹرگوہر کی الگ ملاقات کا مجھے نہیں پتہ۔
فیصل کریم کنڈی کا مزید کہنا تھا کہ امن و امان پر میٹنگ میں ہرممبر نے اپنی رائے دی، بیرسٹرگوہر کی رائے کا احترام کرتا ہوں، کچھ چیزیں وہ نہیں بتا رہے تو میں بھی نہیں بتاسکتا۔
دوسری جانب بیرسٹرگوہر نے 2 روز قبل پشاور میں ہونے والی میٹنگ میں آرمی چیف جنرل عاصم منیر سے ملاقات کی تردید کی ہے۔
پارلیمنٹ ہاؤس میں جیونیوز سےگفتگو کرتے ہوئے بیرسٹرگوہر نےکہا کہ ان کی آرمی چیف سے ملاقات نہیں ہوئی۔
بیرسٹرگوہر نےکہا کہ ہم چاہتے ہیں مذاکرات ہوں، حکومتی حلقوں سے اس پربات چیت چل رہی ہے۔
چیئرمین پی ٹی آئی کا مزید کہنا تھا کہ بات چیت جاری ہے اور مذاکرات ہونے چاہئیں، بات چیت سے ہی مسائل کا حل نکلےگا۔
