02 فروری ، 2025 
امام الحق کو چیمپئنز ٹرافی اسکواڈ میں کیوں شامل نہیں کیا گیا؟ ممکنہ وجوہات سامنے آگئیں
02 فروری ، 2025
آئی سی سی چیمپئنز ٹرافی 2025 کے لیے پاکستانی اسکواڈ میں امام الحق کو شامل نہیں کیے جانے کی ممکنہ وجہ سامنے آگئی۔
چیمپئنز ٹرافی کے اسکواڈ میں فخر زمان کی واپسی کے ساتھ مستند اوپنر کے طور پر سلیکشن کمیٹی نے ٹیسٹ کپتان شان مسعود اور ٹیسٹ اوپنر امام الحق کو ان فٹ صائم ایوب اور آؤٹ آف فارم عبداللہ شفیق کی عدم موجودگی میں اسکواڈ میں شامل کر نے سے گریز کیا۔
بائیں ہاتھ کے ٹیسٹ اوپنر امام الحق جنہوں نے پاکستان کے لیے 72 ون ڈے میچز میں 48.27 کی اوسط سے 3138 رنز 9 سینچریوں اور 20 نصف سینچریوں کی مدد سے بنائے۔
اطلاعات کے مطابق تجربے اور ریکارڈ کے اعتبار سے امام الحق سلیکشن کے لیے مضبوط امیداوار تھے، تاہم چند وجوہات کی بنا پر ان کی سلیکشن کو زیر غور لانے سے گریز کیا گیا۔
امام الحق نے پاکستان کے لیے آخری ون ڈے 27 اکتوبر 2023 کو چنائے میں کھیلا تھا۔
سلیکڑز امام الاحق کے ویسٹ انڈیز کے خلاف گزشتہ ماہ سہہ روزہ میچ میں ایک دن پہلے ٹیم سے علیحدہ ہو نے پر تحفظات کا شکار ہیں۔
امام الحق پہلی اننگز میں 5 رنز بناکر آوٹ ہوئے تھے جبکہ دوسری اننگز میں محمد حریرہ کے ساتھ اننگز کا آغاز عمیر بن یوسف نے کیا تھاکیونکہ امام الحق تیسرے دن اسلام آباد سے کوچ عمر گل سے اجازت لے کر لاہور چلے گئے تھے۔
ملتان میں ویسٹ انڈیز کے مقابلے پر محمد حریرہ کو ٹیسٹ ڈیبیو کروایا گیا البتہ دوسرے ٹیسٹ میں سلیکڑز اور ٹیم منیجمنٹ فاسٹ بولر کو ڈراپ کرکے امام الحق کو ٹیسٹ کھلانا چاہتی تھی البتہ اطلاعات ہیں کہ 29 سال کے امام الحق کی فٹنس پر سوال اٹھ گیا۔
امام الحق پاکستان کر کٹ بورڈ کے 24-2023 کے سینڑل کنڑیکٹ کی ’بی‘ کیٹگری کا حصہ تھے البتہ بائیں ہاتھ کے اوپنر کو فٹنس پر 25-2024 کے سینڑل کنڑیکٹ کی کسی کیٹگری میں شامل نہیں کیا گیا تھا۔
دوسری جانب ٹیسٹ اوپنر امام الحق نے چیمپئنز ٹرافی کے اسکواڈ میں شامل نہیں کیے جانے پر سوشل میڈیا پلیٹ فارم ’ایکس‘ پر لکھا کہ نتیجہ میری توقع کے مطابق نہیں ہے لیکن سفر ابھی ختم نہیں ہوا یہی زندگی ہے۔
انہوں نے کہا کہ سب کچھ یہی ہے کہ ہر مشکل کے ساتھ آگے بڑھنا ہے اور خود کو مضبوط بنانا ہے اور سب سے اہم صبر اور اللہ پر بھروسہ ہے۔
