08 فروری ، 2025 
پولیس اور وکلا کے درمیان تنازع ، سندھ پولیس کا جوڈیشل کمیشن کیلئے ایڈیشنل چیف سیکرٹری کو خط
08 فروری ، 2025
حیدرآباد: پولیس اور وکلا کے درمیان حالیہ تنازع پر سندھ پولیس نے جوڈیشل کمیشن بنانےکے لیے ایڈیشنل چیف سیکرٹری کو خط لکھ دیا۔
خط میں ایک وکیل کے ملوث ہونےکے مبینہ واقعے کی عدالتی انکوائری کی درخواست کی گئی ہے۔
خط میں کہا گیا ہےکہ قانون کی حکمرانی کے لیے پولیس اور وکلا اہم حصہ دار ہیں، انصاف اور حقائق جاننے کے لیے غیرجانبدارانہ انکوائری کرائی جائے، مستقبل میں ایسے واقعات کی روک تھام کے لیے طریقہ کار وضع کیا جائے۔
سندھ پولیس کی جانب سےکہا گیا کہ 3 فروری کی رات کو تھانہ بھٹائی نگر کی حدود میں ایک کار کو روکا گیا تھا، تسلی بخش جواب نہ ملنے پرکار سوار کےخلاف مقدمہ درج کیا گیا، مقدمہ درج کرنے پر وکلا برادری کی جانب سے احتجاج کیا گیا، وکلا کی جانب سے ایس ایس پی حیدرآباد کے تبادلےکا مطالبہ کیا گیا، وکلا نے مطالبات کی منظوری کے لیے احتجاج کرکے حیدرآباد بائی پاس ہائی وے کو بلاک کیا۔
خط میں کہا گیا کہ سندھ بھرمیں فینسی، جعلی نمبرپلیٹس، ہوٹرز اور کالے شیشے والی گاڑیوں کے خلاف کارروائی جاری ہے۔
