14 فروری ، 2025 
مولانا فضل الرحمان کا پیکا قانون کیخلاف صحافیوں کی حمایت کا اعلان
14 فروری ، 2025
جمعیت علماء اسلام ( جے یو آئی) کے سربراہ مولانا فضل الرحمان نے پیکا قانون کے خلاف صحافیوں کی حمایت کا اعلان کر دیا۔
اسلام آباد میں مولانا فضل الرحمان نے صحافیوں کے اجتماع سے خطاب کرتے ہوئے کہا کہ سیاست دانوں کو ملک کے نظام سے بے دخل کیا جا رہا ہے، پارلیمنٹ کے کردارکو ختم کیا جارہا ہے، جمہوریت اپنامقدمہ ہار رہی ہے، سیاسی جماعتوں کو غیر مؤثر کیا جائے گا تو پھرمعاملات کہاں تک جائیں گے۔
ان کاکہنا تھا کہ حکومت کو اکثریت کے فیصلوں کا احترام نہیں، سیاسی کھیل کھیلے گئے اپوزیشن کو تقسیم کرنے کی کوشش کی گئی، بلوچستان کی صورتحال کے بارے میں کیا ہم نے کبھی سوچنا ہے۔
فضل الرحمان نے کہا کہ عوام کی تائید سے محروم حکومتوں پر قوم کا اعتماد نہیں ہوتا، ڈمی حکومت کے نمائندے عوام کے سامنے نہیں جاسکتے، پیکا قانون کے خلاف صحافیوں کی حمایت کا اعلان کرتا ہوں۔
انہوں نے کہا کہ پی ٹی آئی اور جے یو آئی کو لڑانے کی کوشش کی گئی، عوام نے قطار میں کھڑے ہو کر دکھاوے کیلئے ووٹ دینا ہوتا ہے، جس نے باکس کھولنا ہوتا ہے اس کی مرضی ہے کیا برآمد کرتا ہے، ہم طاقت کے آگے مرعوب نہیں ہوں گے۔
