انٹرٹینمنٹ

ہانیہ عامر اور دلجیت دوسانجھ کی فلم کا نام سامنے آگیا، تصویر بھی وائرل

20 فروری ، 2025

ہانیہ عامر اور دلجیت دوسانجھ کی فلم کا نام سامنے آگیا، تصویر بھی وائرل — ہانیہ عامر کی بھارت میں مقبولیت کسی سے ڈھکی چھپی نہیں، جب کہ دلجیت دوسانجھ پاکستان میں بھی خاصے پسند کیے جاتے ہیں__فوٹو: فائل

پاکستان اور بھارت کے دو جگمگاتے ستاروں کے جلد ایک ساتھ فلم میں آنے کی خبریں زیرِ گردش ہیں اور اس حوالے سے ایک تصویر بھی وائرل ہورہی ہے۔

ہانیہ اور دلجیت دوسانجھ کے درمیان ممکنہ اشتراک کی خبروں کے دوران ان کی نئی فلم کا نام بھی سامنے آگیا ہے۔ ہانیہ عامر کی بھارت میں مقبولیت کسی سے ڈھکی چھپی نہیں جب کہ دلجیت دوسانجھ پاکستان میں بھی خاصے پسند کیے جاتے ہیں۔

دونوں اس وقت خبروں میں آئے جب ہانیہ عامر نے برطانیہ میں دلجیت دوسانجھ کے کانسرٹ میں شرکت کی جہاں گلوکار نے انہیں اسٹیج پر بھی بلایا اور یہ لمحہ سوشل میڈیا پر وائرل ہوگیا۔

ہندوستان ٹائمز کے مطابق ریڈٹ پر مداحوں نے دعویٰ کیا ہے کہ ہانیہ عامر اور دلجیت دوسانجھ ایک میوزک ویڈیو یا فلم کے لیے ساتھ کام کررہے ہیں۔

یہ بھی پڑھیں

سوشل میڈیا صارفین نے دونوں کی لوکیشن ٹریک کی اور قیاس آرائیاں کیں کہ وہ ایڈنبرگ، لندن میں اپنے نئے پروجیکٹ کی شوٹنگ کر رہے ہیں جب کہ دونوں اسٹارز کی ایک ہی مقام سے سوشل میڈیا اسٹوریز بھی سامنے آئی ہیں۔

بھارتی میڈیا رپورٹ کے مطابق ہانیہ عامر اور دلجیت دوسانجھ نیرو بجوا کی آنے والی پنجابی فلم 'سردار جی 3' کی کاسٹ میں شامل ہو چکے ہیں۔

انسٹاگرام پر ہانیہ عامر کی دلجیت دوسانجھ کے ساتھ ایک تصویر سامنے آئی جس میں سردار جی 2 کی کاسٹ کے درمیان ہانیہ عامر بھی کھڑی تھیں۔

رپورٹس کے مطابق سوشل میڈیا پر مداحوں نے تصدیق کی ہے کہ دونوں کو ایڈنبرگ میں شوٹنگ کرتے دیکھا گیا ہے اور وہ دلجیت دوسانجھ کے آنے والے گانے کی میوزک ویڈیو کے لیے کام کررہے ہیں۔