22 فروری ، 2025 
سب سے زيادہ جھوٹ بولنے والے پی ٹی آئی والے ہيں، عوام صوبائی حکومت سے نالاں ہوچکی: پرویز خٹک
22 فروری ، 2025
خیبر پختونخوا کے سابق وزیراعلیٰ پرویز خٹک نے کہا ہے کہ سب سے زيادہ جھوٹ بولنے والے تحریک انصاف والے ہيں اور وہ آج سے جھوٹ کے خلاف جہاد شروع کررہے ہیں۔
نوشہرہ میں جلسے سے خطاب میں پرویز خٹک کا کہنا تھاکہ سیاست میں اپنی پوری زندگی تباہ کردی ہے، ضلع نوشہرہ کے عوام نے ہمارے ساتھ نہیں اپنے ساتھ زیادتی کی ہے۔
انہوں نے کہا کہ سب سے زیادہ جھوٹ بولنے والے تحریک انصاف والے ہیں، آج سے جھوٹ کے خلاف جہاد شروع کروں گا، بطور وزیر اعلیٰ صوبے کے لیے جو کچھ کیا ہے اپنے دم پر کیا ہے، گزشتہ انتخابات میں لوگ اندھے بہرے ہوگئے تھے۔
پرویز خٹک کا کہنا تھاکہ عوام ایک سال میں صوبائی حکومت سے نالاں ہوچکی ہے، صحت کارڈ میں نے شروع کیا تھا، تعلیم اور پولیس میں اصلاحات میں نے کیے تھے۔
ان کا کہناتھاکہ بہت جلد ایک کتاب لکھنے جارہا ہوں اس میں سب کھل کر لکھوں گا۔
پرویز خٹک کا کہنا تھا کہ مولاناسے ملاقات کے بعد لوگوں نے جھوٹ بولنا شروع کیا، میں نے کسی پارٹی میں شمولیت کا اعلان نہیں کیا، آج کا جلسہ اپنے خاندان کے اختلافات ختم کرنے کے لیے کیا ہے اور آج جلسہ نہیں عوامی جرگہ تھا۔
جلسے سے خطاب میں پرویز خٹک کے بھائی لیاقت خٹک نے کہا کہ ہم بھائیوں کے درمیان غط فہمیاں دور ہوگئیں۔
خیال رہے کہ 2023 میں پرویز خٹک نے پاکستان تحریک انصاف سے علیحدگی اختیار کرتے ہوئے پی ٹی آئی پارلیمنٹرینز کے نام سے جماعت بنائی تھی۔
عام انتخابات 2024 میں پرویز خٹک اپنی نشستوں سے ہار گئے تھے جس کے بعد انہوں نے پارٹی کی چیئرمین شپ چھوڑتے ہوئے سیاست سے بریک لینے کا اعلان کیا تھا۔
