23 فروری ، 2025 
آئی ایم ایف کی قسط لینا آسان، ٹیم کا اگلے مرحلے میں جانا مشکل ہوگیا، گورنر سندھ
23 فروری ، 2025
کراچی: آئی سی سی چیمپئنز ٹرافی میں قومی ٹیم کی مایوس کن کارکردگی سے شائقین کی طرح گورنر سندھ کامران ٹیسوری کا بھی دل ٹوٹ گیا۔
گورنر سندھ کامران ٹیسوری نے کہا کہ آئی ایم ایف کی قسط لینا آسان اور ٹیم کا چیمپئنز ٹرافی کے اگلے مرحلے میں جانا مشکل ہوگیا۔
گورنر سندھ نے کہا کہ قومی ٹیم کی بیٹنگ لائن لڑکھڑائی، بالر کپکپائے، یہ دیکھ کر سارا مزہ کرکرا ہوگیا، چئیرمین پی سی بی نے جیسے اسٹیڈیم بنائے ویسی ٹیم بھی بناتے۔
کامران ٹیسوری نے کہا کہ بہترین صلاحیتوں کے حامل بلےبازوں اور جان لڑانے والے فیلڈز کی ضرورت ہے، ایک بار اعلیٰ ترین معیار اپنا کر ٹیم بنالی تو شائقین کبھی مایوس نہیں ہوں گے۔
گورنر سندھ کامران ٹیسوری نے کہا کہ اگر ٹیم میچ جیت جاتی تو ایک کروڑ روپے انعام دیتا۔
خیال رہے کہ دبئی اسٹیڈیم میں کھیلےگئے چیمپئنز ٹرافی کے اہم میچ میں پاکستان کی پوری ٹیم 49 اعشاریہ 4 اوورز میں 241 رنز بنا کر آؤٹ ہوگئی، جواب میں 242 رنز کا ہدف بھارت نے 43 اوور میں 4 وکٹ کے نقصان پر پورا کرلیا۔
اس سے قبل پاکستان نیوزی لینڈ کے خلاف بھی اپنا افتتاحی میچ ہار چکا ہے۔
پاکستان کرکٹ ٹیم کے لیے آئی سی سی چیمپئنز ٹرافی کے اگلے راؤنڈ تک جانے کا سفر مشکل ہوچکا ہے، نیوزی لینڈ اور بھارت کے خلاف دو لگاتار شکستوں کے بعد پاکستان کی سیمی فائنل تک رسائی کے امیدیں اب صرف اگر مگر کے تکنیکی امکان پر ٹکی ہوئی ہیں، تاہم اس کے لیے باقی میچز کے نتائج پر انحصار کرنا پڑے گا۔
