25 فروری ، 2025 
مغربی ہواؤں کا سسٹم بلوچستان میں داخل ،کوئٹہ سمیت بیشتر علاقوں میں موسلادھار بارش
25 فروری ، 2025
مغربی ہواؤں کا سسٹم بلوچستان میں داخل ہوگیا جس کے بعد کوئٹہ سمیت صوبے کے بیشترعلاقوں میں موسلادھار بارش ہوئی ہے۔
منگل کی صبح چمن سمیت گردونواح میں بھی موسلادھار بارش ہوئی جبکہ بالائی علاقوں میں کہیں ژالہ باری تو کہیں برفباری ہوئی ہے۔
بارش کی وجہ سے بلوچستان کے متعدد شہروں میں بجلی اور مواصلاتی نظام متاثر ہوگیا۔
دوسری جانب لاہور ، ملتان،چیچہ وطنی سمیت پنجاب کے مختلف شہروں میں بھی بارش ہوئی جبکہ شمالی اور جنوبی وزیرستان میں بھی بادل برسے ہیں۔
محکمہ موسمیات کے مطابق بارشیں برسانے والا سسٹم 2 مارچ تک برقرار رہنے کی توقع ہے جس کے تحت اسلام آباد، پنجاب،خیبر پختونخوا،گلگت بلتستان اور کشمیر میں بارش اور پہاڑی علاقوں میں برف بار ی کا ا مکان ہے ۔
اس کے علاوہ آج اور کل سندھ کے شہروں لاڑکانہ، قمبر شہداد کوٹ، جیکب آباد اور سکھر میں ہلکی بارش کا امکان ہے۔
