گوتم گھمبیر بھارت کو دبئی میں حاصل ایڈوانٹیج پر تنقیدکرنے والوں پر برس پڑے

بھارتی کرکٹ ٹیم کے کوچ گوتم گھمبیر  نے آئی سی سی چیمپئنز ٹرافی میں دبئی کی کنڈیشنز   پر  بھارت کو  ملنے والے ایڈوانٹیج کے دعوے کو سختی سے مسترد کر دیا۔

دبئی میں بھارت کی جانب سے سیمی فائنل میں آسٹریلیا کو شکست دینےکے بعد پریس کانفرنس کرتے ہوئے گوتم گھمبیر کا کہنا تھا کہ اگر  یہ ٹورنامنٹ مکمل پاکستان میں ہوتا تو بھی ہم دو اسپنرز کے ساتھ جاتے، لہٰذا یہ کہنا کہ ہمیں دبئی میں برتری حاصل ہے بالکل بے بنیاد ہے۔

انہوں نے سخت اور واضح الفاظ میں کہا کہ بھارتی ٹیم نے دبئی اسٹیڈیم میں ایک دن بھی پریکٹس نہیں کی بلکہ ٹیم نے آئی سی سی اکیڈمی میں ٹریننگ کی، جس کی کنڈیشنز دبئی اسٹیڈیم کی وکٹ سے بالکل مختلف ہیں، یہ تنقید بلاوجہ اور حقیقت سے دور ہے۔

گوتم گھمبیر نے کہا کہ دبئی کی کنڈیشنز بھارت کے لیے اتنی ہی اجنبی ہیں جتنی کسی اور ٹیم کے لیے۔

چیمپئنز ٹرافی میں بھارتی ٹیم کو فائدہ ہی فائدہ، پیٹ کمنز کی آئی سی سی پر تنقید

ظاہر ہے کہ بھارت کو ایک وینیو پر کھیلنے سے بہت بڑا ایڈوانٹیج حاصل ہے: کمنز کی گفتگو

پریس کانفرنس کے دوران گوتم گھمبیر نے کئی بار صحافیوں کے سوالات کو دو ٹوک انداز میں رد کیا اور کھری کھری سنائیں۔

گوتم گھمبیر نے واضح کیا کہ دبئی کی پچ پر بھارت کو کسی قسم کی برتری حاصل نہیں۔

 انہوں نے ان تنقید نگاروں کو رد کرتے ہوئے کہا کہ بھارت نے کب اور کون سا ٹورنامنٹ دبئی کی موجودہ کنڈیشنز میں کھیلا ہے؟ مجھے یاد نہیں۔

گوتم گھمبیر نے ٹیم سلکیشن پر بھی صحافیوں کو آڑے ہاتھوں لیا اور کہا کہ بطور جرنلسٹ آپ کھلاڑیوں کے رنز اور وکٹ کے اعداد و شمار دیکھتے ہیں لیکن ہم پلیئرز کے میچ پر ڈالے گئے اثرات (impact) کا تجزیہ کرتے ہیں، کسی کھلاڑی کے زیادہ اسکور کا مطلب یہ نہیں کہ وہ بڑا کھلاڑی ہے، میچ کے نتیجے پر اثر ڈالنا اہم ہے۔

گھمبیر نے بھارتی ٹیم کی کارکردگی پر مکمل اعتماد کا اظہار کرتے ہوئے کہا کہ ہماری ٹیم نے ہر ڈیپارٹمنٹ میں بہترین کارکردگی دکھائی ہے، ہر کھلاڑی نے اپنی ذمہ داری نبھائی اور جیت کا جذبہ ظاہر کیا لیکن ابھی ایک میچ باقی ہے جسے ہمیں ہر حال میں جیتنا ہے۔

انہوں نے مزید کہا کہ انہیں سلیکشن یا ٹیم کی کارکردگی پر تنقید کرنے والوں کی کوئی پرواہ نہیں، ہمارا فوکس صرف پلیئرز کی کارکردگی اور ٹیم کی کامیابی پر ہے۔