کھیل

ون ڈے کرکٹ سے ریٹائرمنٹ کی خبروں پر روہت شرما کا ردعمل آگیا

09 مارچ ، 2025

ون ڈے کرکٹ سے ریٹائرمنٹ کی خبروں پر روہت شرما کا ردعمل آگیا — فوٹو: آئی سی سی

بھارتی کرکٹ ٹیم کے کپتان روہت شرما نے ون ڈے کرکٹ سے ریٹائرمنٹ کی خبروں پر خاموشی توڑ دی۔

بھارتی کپتان روہت شرما نے آئی سی سی چیمپئنز ٹرافی کے فائنل میں بھارت کی حالیہ فتح کے بعد پریس کانفرنس ختم کرنے کے فوراً بعد اپنی ریٹائرمنٹ سے متعلق افواہوں کو تردید کی۔

روہت شرما نے اپنی ریٹائرمنٹ پر بات کرتے ہوئے کہا، "دوستوں، میں یہ کہنا چاہوں گا کہ میں ریٹائرڈ نہیں ہو رہا ہوں اور لوگ جھوٹی افواہیں پھیلا رہے ہیں، آگے بڑھیں اور کرکٹ پر توجہ دیں۔"

فائنل میں فتح کی پریس کانفرنس کے اختتام پر روہت نے اپنے مؤقف کو واضح کرتے ہوئے کہا، "میں اس فارمیٹ سے ریٹائر نہیں ہو رہا ہوں اور کوئی افواہیں نہ پھیلائیں ۔"

دبئی کے ٹورنامنٹ کے دوران بھارت کی حکمت عملی پر بات کرتے ہوئے روہت نے اسپنرز کے کردار کو ٹیم کی کامیابی میں اہم قرار دیا۔

انہوں نے کہا، "جب مجھے دبئی میں ٹورنامنٹ کھیلنے کے بارے میں پتہ چلا تو ہم نے چار اسپنرز کو منتخب کیا کیونکہ دبئی کی پچ کافی عرصے سے کرکٹ کے لیے استعمال ہو رہی تھی اور جہاں کافی کرکٹ ہوچکی ہو وہاں اسپنرز میچ ونر بن سکتے تھے، ٹیم کے اسپنرز کو اسی بنیاد پر منتخب کیا گیا اور انہوں نے شاندار کارکردگی کا مظاہرہ کیا۔"

فائنل کے چیلنجنگ لمحات پر بات کرتے ہوئے روہت شرما نے تسلیم کیا کہ ابتدائی تین وکٹوں کے نقصان نے دباؤ پیدا کیا۔

انہوں نے کہا "یہ ایک مشکل مرحلہ تھا، اور کھیل کو جیت کے لیے ایک بڑی شراکت داری کی ضرورت تھی،" انہوں نے ٹیم کی مشکلات پر قابو پانے کی صلاحیت کو سراہا۔

روہت شرما نے بھارت کے 2023 ورلڈ کپ کے فائنل میں آسٹریلیا کے خلاف احمد آباد میں شکست کے دکھ کا بھی ذکر کیا۔

انہوں نے کہا "2023 ورلڈ کپ کا فائنل نہ جیتنا ایک افسوسناک بات ہے، خاص طور پر ہوم کراؤڈ کے سامنے شکست ہوئی تھی تاہم ہماری ٹیم کی پچھلے تین سالوں کی کارکردگی غیرمعمولی رہی ہے۔ ٹی ٹوئنٹی ورلڈ کپ کے تمام میچ جیتے، ٹرافی حاصل کی اور اب چیمپئنز ٹرافی جیت کر ایک اور ٹرافی حاصل کی۔

خیال رہےکہ بھارتی میڈیا پر خبریں سامنے آرہی تھیں کہ چیمپئنز ٹرافی کے بعد روہت شرما ون ڈے کرکٹ سے ریٹائرمنٹ کا اعلان کرسکتے ہیں، روہت شرما ٹی ٹوئنٹی فارمیٹ سے پہلے ہی ریٹائر ہوچکے ہیں۔