11 مارچ ، 2025 
ناکام سیاستدان سیاست چمکانےکیلئے نہروں کے معاملےکو ہوا دے رہے ہیں: احسن اقبال
11 مارچ ، 2025
وفاقی وزیر برائے منصوبہ بندی و ترقی احسن اقبال کا کہنا ہےکہ سندھ کا پانی کم کرنےکی بات میں کوئی صداقت نہیں، مین اسٹریم سے باہر ناکام سیاست دان اپنی سیاست چمکانےکے لیے اس معاملے کو ہوا دے رہے ہیں۔
جیو نیوز کے پروگرام آج شاہ زیب خانزادہ کے ساتھ میں بات کرتے ہوئے احسن اقبال کا کہنا تھا کہ مجموعی طورپر پانی کی کمی کا اثر تمام صوبوں پر پڑ رہا ہے، پیپلز پارٹی اس لیے یہ مسئلہ اُٹھارہی ہےکہ اس کے صوبے میں اس مسئلے کو بے جا اٹھایا جا رہا ہے۔
احسن اقبال کا کہنا تھا کہ وزیراعظم نے پیپلزپارٹی کو یقین دہانی کرائی ہےکہ سندھ کے مفاد کے خلاف کوئی فیصلہ نہیں کیاجائےگا۔
احسن اقبال نے مزید کہا کہ پاکستان کے حوالے سے منفی رپورٹس کے پیچھے پی ٹی آئی کی ایک گہری اور منظم مہم ہے، دہشت گردی کی واپسی بھی پی ٹی آئی کا تحفہ ہے جو ٹی ٹی پی کو واپس لے کر آئی۔
دوسری جانب وزیراعظم شہباز شریف نے پاکستان پیپلزپارٹی کے چیئرمین بلاول بھٹو زرداری کو ملاقات میں دریائے سندھ سے نہریں نکالنے کا معاملہ خوش اسلوبی سے حل کرنے کی یقین دہانی کرائی ہے۔
وزیراعظم کی جانب سے بلاول بھٹو زرداری اور وفد کے اعزاز افطار ڈنر کا اہتمام کیا گیا۔
ذرائع کے مطابق افطار ڈنر کے موقع پر تمام مسائل پر تبادلہ خیال کیا گیا اور اس بات پر اتفاق کیا گیا کہ بقیہ مسائل کو باہمی مشاورت سے حل کیا جائے۔
