عمران ہاشمی نے جاوید شیخ کے برے رویے سے متعلق بیان پر ردعمل دیدیا

بالی وڈ اداکار عمران ہاشمی  نے پاکستان کے سینئر اداکار جاوید شیخ کے خود سے منسلک بُرے رویےکے  بیان کو عجیب قرار دے دیا۔

جاوید شیخ کا بیان

جاوید شیخ نے  ایک نجی ٹی وی کے پروگرام میں  گفتگو کے دوران بالی وڈ اداکار عمران ہاشمی کے برے رویے کا تذکرہ کرتے ہوئے بتایا تھا کہ مہیش بھٹ فلم 'جنت' کے پروڈیوسر تھے اور اس فلم کا ایک نیا ڈائریکٹر تھا، جب مجھے فلم کی اسٹوری بتائی گئی تو اس وقت تک میری ملاقات عمران ہاشمی سے نہیں ہوئی تھی، اس کے بعد فلم کی شوٹنگ  کے دوران ڈائریکٹر نے جب عمران ہاشمی سے میرا تعارف کروایا تو  میں نے ملنے کیلئے ہاتھ آگے بڑھایا تو عمران ہاشمی منہ موڑ کر چلے گئے جس پر مجھے بہت غصہ آیا تھا۔

جاوید شیخ نے بالی وڈ اداکار عمران ہاشمی کے برے رویے کا قصہ سنادیا

جاوید شیخ نے نجی ٹی وی کے پروگرام میں شرکت کی جہاں انہوں نے بھارتی اداکار عمران ہاشمی کے ساتھ کام کرنے کے تجربے کے حوالے سے گفتگو کی

جاوید شیخ کے مطابق پھر ڈائریکٹر نے مجھے کہا کہ سین کی ایک بار ریہرسل کرنی ہے عمران ہاشمی وہاں بیٹھے ہیں آئیے ریہرسل کرلیتے ہیں جس پر میں نے جانے سے منع کردیا اور کہا کہ عمران کو میرے پاس بلاؤ، ڈائریکٹر نے اسے بلایا اور ہم نے ریہرسل کی، فلم کی شوٹنگ کے دوران میں نے عمران ہاشمی سے کبھی بات نہیں کی اور نہ ہی کبھی اس کی طرف دیکھا۔

عمران ہاشمی کا ردعمل 

اپنی 46 ویں سالگرہ  پر بھارتی میڈیا سے گفتگو کے دوران عمران ہاشمی  نے جاوید شیخ کے بیان پر ردعمل دیتے ہوئے کہا کہ ’مجھے ان کے ساتھ  اپنی  پہلی ملاقات یاد نہیں کیونکہ یہ بہت عرصہ پہلے ہوئی تھی لیکن مجھے یاد ہے کہ میرے اور جاوید شیخ  کے  ہمیشہ خوشگوار تعلقات  رہے‘۔

عمران ہاشمی نے مزید کہا کہ ’ ان کا بیان  عجیب ہے،  اس وقت میری عمر 20 سال تھی  اور وہ میری عمر  کے نہیں تھے اس لیے ہم کبھی دوست نہیں بن سکے  لیکن وہ جو کہہ رہے ہیں اس حوالے سے  مجھے کچھ یاد نہیں، مجھے نہیں معلوم کہ جاوید شیخ اپنے ساتھ کیا واپس لے گئے‘۔