یوٹیوب میوزک میں ایک بہترین فیچر کا اضافہ

21 اپریل ، 2025

یوٹیوب میوزک میں ایک بہترین فیچر کا اضافہ — ایک رپورٹ میں اس بارے میں بتایا گیا / فوٹو بشکریہ یوٹیوب

اگر آپ یوٹیوب میوزک پر گانے سننا پسند کرتے ہیں تو اچھی خبر یہ ہے کہ گوگل نے اس میں ایک بہترین فیچر کا اضافہ کر دیا ہے۔

9 ٹو 5 گوگل کی رپورٹ کے مطابق اینڈرائیڈ اور آئی او ایس ڈیوائسز کے لیے یوٹیوب میوزک ایپ میں consistent volume فیچر متعارف کرایا گیا ہے۔

اس فیچر کا مقصد تمام گانوں کے لیے ایک جیسے والیوم رینج کو استعمال کرنا ہے۔

یعنی اگر کوئی گانا بہت زیادہ آواز والا ہے یا کوئی گانا بہت مدھم آواز کا ہے تو اس فیچر کی بدولت دونوں کو سننے کا تجربہ لگ بھگ ایک جیسا ہی محسوس ہوگا۔

بلند آواز والے گانے بلند آواز کے ہی ہوں گے اور مدھم سروں والے گانے بھی مدھم ہی ہوں گے، مگر اس فیچر کے تحت گانوں کو مختلف والیوم لیولز میں خودکار طور پر تبدیل کر دیا جائے گا، تو آپ کے کانوں کو انہیں سننے کا تجربہ ناگوار محسوس نہ ہو۔

اس سے قبل یوٹیوب ایپس میں اسٹیبل والیوم کا فیچر کچھ عرصے سے دستیاب تھا مگر اب اسے نئے فیچر سے مزید بہتر بنایا جا رہا ہے۔

رپورٹ کے مطابق اس نئے فیچر کی آزمائش محدود صارفین میں کی جا رہی ہے اور یہ بتدریج تمام افراد کو دستیاب ہوگا۔

اگر آپ اسے چیک کرنا چاہتے ہیں تو اینڈرائیڈ یا آئی او ایس پر یوٹیوب میوزک ایپ کو اوپن کریں اور پھر اوپر دائیں جانب پروفائل پکچر پر کلک کرکے سیٹنگز میں جائیں۔

وہاں پلے بیک (اینڈرائیڈ) یا پلے بیک اینڈ ریسٹرکشنز (آئی او ایس) پر کلک کریں۔

اگر فیچر دستیاب ہوا تو وہاں آپ کو اس کا آپشن نظر آئے گا۔

اس فیچر کا مطالبہ کافی عرصے سے صارفین کی جانب سے کیا جا رہا تھا اور اب گوگل نے اسے پورا کر دیا ہے۔

مگر کمپنی کی جانب سے فی الحال سے متعارف کرانے کا باضابطہ اعلان نہیں کیا گیا۔