دفاعی صنعت میں ہمارے پاس اتنے آرڈر ہیں کہ 2 سالوں میں بھی شاید پورا نہ کرسکیں: وفاقی وزیر

اسلام آباد: وفاقی وزیر دفاعی پیداوار  رضا حیات ہراج نےکہا ہےکہ دفاعی صنعت میں ہمارے پاس اتنے آرڈر ہیں کہ ہم اگلے 2 سالوں میں بھی شاید پورا نہ کرسکیں۔

پروگرام کیپٹل ٹاک میں گفتگو کرتے ہوئے  وفاقی وزیر دفاعی پیداوار  رضا حیات ہراج نے کہا کہ  مختلف ممالک  اپنی ضرورت کے مطابق مختلف دفاعی سامان خریدتے ہیں، کوئی بہت مہنگا خریدتا ہے اور بہت سارے ممالک کم قیمت کا سامان خریدتے ہیں، الحمداللہ ہمارے پاس وہ سب کچھ ہے جو ہم دنیا کے لیے بناسکتے ہیں۔

وفاقی وزیر دفاعی پیداوار کا کہنا تھا کہ ساری دنیا سمجھ رہی تھی کہ پتہ نہیں بھارت کے پاس کیا ہے اور ہم لوگ خاموش تھے جس کا فائدہ یہ ہوا کہ اب پوری دنیا نے دیکھ لیا کہ پاکستان کا دفاع بہت ہی مضبوط ہاتھوں میں ہے، پاکستان کی پذیرائی بہت سارے ممالک کی آنکھیں کھول دینے کے لیے کافی ہے، تمام دنیا کو معلوم ہوگیا کہ پاکستان کی ائیرفورس، پاکستان کی آرمی اور پاکستانی کی نیوی بہت ہی پروفیشنل ہے۔

پاکستان کیجانب سے بھارت کے ایس 400 کو کامیابی سے نشانہ بنانےکا ایک اور ثبوت سامنے آگیا

ترجمان پاک فوج نے بتایا تھا کہ پاک فوج نے 2 مقامات پر بھارت کے ایس 400 بیٹری سسٹم کوکامیابی سے نشانہ بنایا ہے

رضا حیات ہراج کا کہنا تھا کہ پاکستان کا مؤقف واضح ہےکہ کشمیر ہمارا ہے ہم لےکر رہیں گے، ہماری فوج نے بھارت کا جو حشر نشر کیا ان کو مدتوں یاد رہےگا، ہمارے 26 اہداف میں کوئی سویلین ٹارگٹ نہیں تھا، بھارت نے یہاں مساجد کو ٹارگٹ کیا۔

ان کا کہنا تھا کہ بھارت ہم سے بات کرےگا تو  ہماری ٹرمز اینڈ کنڈیشنز  پر بات کرےگا۔

 دفاعی تجزیہ کار  ائیر وائس مارشل ریٹائرڈ اعجاز محمود کا کہنا تھا کہ جے ایف 17 کی تمام ڈیزائننگ پاکستان نے کی ہے۔

 ان کا کہنا تھا کہ سیز فائر بھارت کو سوٹ کرتا تھا تو اس لیے امریکا اس معاملے میں آیا، شاید ڈونلڈ ٹرمپ نوبیل پیس پرائز کے لیے کوشش کررہے ہوں،  پاک بھارت مذاکرات کی کامیابی کا دار ومدار امریکی انتظامیہ کی نیت پر ہے۔