18 مئی ، 2025 
کراچی کیخلاف پلان کو بروئے کار لانے میں ناکام رہے: کپتان پشاور زلمی بابر اعظم
18 مئی ، 2025
راولپنڈی: ایچ بی ایل پاکستان سپر لیگ (پی ایس ایل) 10 کی ٹیم پشاور زلمی کے کپتان بابر نے کراچی کنگز کیخلاف کامیاب نہ ہونے کی وجہ بتا دی۔
پریس کانفرنس کرتے ہوئے بابر اعظم کا کہنا تھا میں اچھی پرفارمنس کا کچھ عرصے سے انتظار کر رہا تھا، اچھی اننگز کے بعد میچ نہ جیتیں تو اطمینان نہیں ہوتا، پہلے بولنگ کرکے پچ کی صورتحال معلوم ہو جاتی ہے، پچ کو جانچنا بھی ایک مہارت ہوتی ہے۔
انہوں نے کہا کہ کراچی کنگز کے خلاف پلان کو بروئے کار لانے میں ناکام رہے، پی ایس ایل میں بریک آئی لیکن غیر ملکی کھلاڑیوں کا واپس آنا تعریف کے قابل ہے۔
انہوں نے یہ بھی کہا کہ فارم کو واپس لانے کی کوشش ہی کر سکتا ہوں، میں اپنی غلطی سے ہی زیادہ آؤٹ ہوتا ہوں،کبھی 20 یا 40 رنز سے بھی فارم واپس آجاتی ہے، پی سی بی سلیکٹرز سے پلان سے متعلق کوئی بات نہیں ہوئی، ایسا نہیں کہ میں ٹی ٹوئنٹی اوپنر ہوں تو اوپننگ ہی کروں گا، جو ٹیم کے لیے اچھاہو وہی فیصلہ کروں گا، بیٹنگ نمبرز اسی حساب سے تبدیل کرتا رہتا ہوں۔
بابر اعظم نے مزید کہا کہ جو بہترین پلیئنگ الیون ہوگی اسی کے ساتھ لاہور قلندرز کے خلاف میدان میں اتریں گے۔
ایک سوال کے جواب میں بابر اعظم کا کہنا تھا پشاورزلمی کا افواجِ پاکستان کو خراجِ تحسین پیش کرنا بہترین اقدام ہے، راولپنڈی کرکٹ اسٹیڈیم میں پٹاخوں کا چلنا سب نے انجوائے کیا۔
واضح رہے کہ پی ایس ایل 10 کے27 ویں میچ میں کراچی کنگز نے پشاور زلمی کو 23 رنز سے ہرا کر پلے آف کے لیے کوالیفائی کرلیا۔
مزید خبریں :
پاکستانی کوہ پیما سرباز خان نے نئی تاریخ رقم کردی
3 گھنٹے پہلے
