اے آئی ٹیکنالوجی سے 3 کیرئیر متاثر ہونیکا امکان نہیں، بل گیٹس کی پیشگوئی

مائیکرو سافٹ کے شریک بانی بل گیٹس نے کافی عرصے سے آرٹی فیشل انٹیلی جنس (اے آئی) ٹیکنالوجی کو موجودہ عہد کی اہم ترین پیشرفت قرار دے رہے ہیں۔

اب ایک انٹرویو میں انہوں نے اے آئی ٹیکنالوجی کے حوالے سے اپنے خیالات کا ایک بار پھر اظہار کیا۔

انہوں نے کہا کہ اس نئی ٹیکنالوجی دنیا کے متعدد ورکرز متاثر ہوسکتے ہیں مگر 3 شعبے ایسے ہیں جن میں کام کرنے والے افراد متاثر نہیں ہوں گے۔

انہوں نے پیشگوئی کی کہ 3 کیرئیر اے آئی سے محفوظ رہیں گے، جن میں بائیولوجی، توانائی ماہرین اور پروگرامرز شامل ہیں۔

بل گیٹس کی مستقبل کے بارے میں دنگ کر دینے والی پیشگوئی

بل گیٹس نے بتایا کہ آئندہ دہائی کے دوران اے آئی ٹیکنالوجی ہی ڈاکٹر اور استاد کی جگہ سنبھال لے گی۔

ان کا کہنا تھا کہ بائیولوجسٹ انسانی ارتقا اور دیگر معاملات پر تخلیقی انداز سے کام کرتے ہیں۔

انہوں نے کہا کہ بائیولوجسٹ کے کام کرنے کا طریقہ اے آئی ٹیکنالوجی سے بالکل مختلف ہے اور اس ٹیکنالوجی کے لیے اس کی نقل کرنا لگ بھگ ناممکن ہے۔

بل گیٹس نے کہا کہ اے آئی ٹیکنالوجی تحقیق اور تفصیلات کا تجزیہ کرنے کے لیے بہترین ہے مگر انسانی دماغ سوچنے اور دیگر معاملات میں اس پر سبقت رکھتا ہے

انہوں نے بتایا کہ توانائی ماہرین اور پروگرامرز بھی اے آئی کے پھیلاؤ سے محفوظ رہیں گے کیونکہ ان کے کام کرنے کا طریقہ بھی اس ٹیکنالوجی کے طریقہ کار سے کافی مختلف ہے۔

ان کا کہنا تھا کہ اے آئی ٹیکنالوجی ان خوبیوں سے محروم ہے جو انسانی دماغ کو حاصل ہیں اور ہم پیچیدہ سافٹ وئیر تیار کرسکتے ہیں یا عالمی توانائی کی طلب کے مطابق خود کو ڈھال سکتے ہیں۔

اس سے قبل ایک اور انٹرویو کے دوران بل گیٹس نے خیال ظاہر کیا تھا کہ ایتھلیٹس کا روزگار بھی اے آئی ٹیکنالوجی سے محفوظ رہ سکتا ہے۔

بل گیٹس نے کہا کہ کسی کھیل جیسے بیس بال میں ہم کمپیوٹرز کو کھیلتے دیکھنا پسند نہیں کریں گے۔

اسی طرح مارچ 2025 میں ایک انٹرویو کے دوران بل گیٹس نے پیشگوئی کی تھی کہ آئندہ ایک دہائی میں آرٹی فیشل انٹیلی جنس (اے آئی) ٹیکنالوجی اتنی پیشرفت کرلے گی کہ دنیا میں بیشتر کاموں کے لیے انسانوں کی ضرورت باقی نہیں رہے گی۔

بل گیٹس نے کہا کہ ابھی مختلف شعبوں جیسے طب اور تعلیم میں ہمیں انسانی ماہرین کی ضرورت ہوتی ہے۔

بل گیٹس کا کہنا تھا کہ دنیا ایک نئے عہد میں داخل ہونے والی ہے جہاں مختلف شعبوں میں انسانی ماہرین کی ضرورت باقی نہیں رہے گی۔

انہوں نے فروری میں ایک انٹرویو کے دوران کہا تھا کہ اے آئی ٹیکنالوجیز میں ہونے والی پیشرفت ہر ایک کے لیے قابل رسائی ہوگی اور لگ بھگ ہماری زندگی کے تمام پہلوؤں تک پہنچ جائے گی۔

انہوں نے مزید کہا کہ اے آئی اور ورچوئل اسسٹنٹس کی بدولت امراض کی تشخیص کا عمل بہت زیادہ بہتر ہو جائے گا۔

بل گیٹس نے کہا کہ 'ایسا بہت تیزی سے ہو رہا ہے اور یہ کچھ حد تک خوفزدہ کر دینے والا بھی ہے کیونکہ یہ برق رفتاری سے ہو رہا ہے'۔