کیا اسرائیلی دفاعی نظام ایرانی ہائپرسانک میزائل تباہ کرسکتا ہے؟

ایران نے اتوار کی صبح اسرائیل پر  ہائپر سانک میزائل سے حملے کیے، اس سے قبل بھی ایران نے تل ابیب پر کئی میزائل داغے جس میں 10 افراد ہلاک اور 200 سے زائد زخمی ہوئے۔

اب سوال یہ پیدا ہوتا ہے کہ کیا اسرائیلی دفاعی نظام ایرانی ہائپرسانک میزائل کو تباہ کرنے کی صلاحیت رکھتا ہے؟

ماہرین کے مطابق اسرائیلی دفاعی نظام ہائپرسانک میزائلوں کو تباہ کرنے کےلیے ڈیزائن ہی نہیں ہوا،ایرانی میزائل حملے اسی لیے کافی حد تک کامیاب ہورہے ہیں، اسرائیل اور ایران کی جنگ نے مستقبل کی جنگوں کی حکمت عملی کا تعین کردیا ہے اور اب جنگی کالجز اور اسکولوں میں مدتوں تک اس حکمت عملی کو مختلف زاویوں سے جانچاجاتا رہے گا۔

ایران کا اسرائیل پر ہائپر سانک میزائل سے حملہ

ایران نے صبح سویرے اسرائیل پر ایک اور بڑا حملہ کیا

اسرائیلی دفاعی نظام بظاہر ایرانی میزائل حملوں کو روکنے میں ناکام نظرآتا ہے کیونکہ یہ میزائل دفاعی نظام ہائپرسانک میزائلوں کو تباہ کرنے کےلیے ڈیزائن ہی نہیں ہوئے، اسے سمجھنے کےلیے آئیے اسرائیلی دفاعی نظام کو سمجھتے ہیں۔ 

اسرائیل کے پاس دفاعی نظام کی تفصیلات:

اسرائیل کے پاس اس وقت تین میزائل دفاعی نظاموں کی  تہیں ہیں جس میں سے سب سے کم مار کا نظام آئرن ڈوم ہے جو ان غیر گائیڈ ڈ راکٹوں کو فضا میں تباہ کرنے کے لیے استعمال  ہوتا ہے جو عموماً حماس اور حزب اللہ اسرائیل پر داغتے تھے، اس کے علاوہ چھوٹی رینج کے ڈرونز کو بھی ان سے نشانہ بنایاجاسکتا ہے۔ 

اسرائیلی میزائل دفاعی نظام کی دوسری تہ ڈیوڈ سلنگ ( داؤدی غلیل) ہے جودرمیانی فاصلے تک مار کرنے والے میزائلوں اور ڈرونز کو ہدف بنا کر نشانہ بنانے کےلیے استعمال ہوتا ہے۔ 

مندرجہ بالا دونوں نظام سب سانک میزائلوں سے نمٹنے کےلیے ہیں یعنی ایسےمیزائل جن کی رفتارآواز سے کم ہو۔ 

تیسرا میزائل دفاعی نظام ایرومیزائل ڈیفنس کا ہے، اس کے بھی متعدد ورژنز اسرائیل میں موجود ہیں جن میں ایرو 1 ، ایرو2 اور ایرو3 شامل ہیں۔ یہ سپرسانک اور طویل فاصلے کے بیلسٹک میزائلوں کو فضا میں نشانہ بنا کر تباہ کرنے کےلیے ہے, البتہ اگر بیلسٹک میزائلوں کی تعداد زیادہ ہوتو یہ نظام اوورلوڈ ہونے کی وجہ سے سارے میزائلوں کو بیک وقت نشانہ بنانے سے قاصر رہتا ہے۔

باراک میزائل سسٹم بھی اسی تہہ کا حصہ ہے اوریہ بھی بیلسٹک میزائلوں کو تباہ کرنے کے لیے بطور زمین سے فضا میں مار کرنے والے میزائل کے طور پر استعمال ہوتے ہیں،  اس کامطلب یہ ہے کہ اگر بیلسٹک میزائل ایک غول کی صورت میں حملہ آور ہوں تو ان میزائلوں کے فضا میں تباہ ہونے کے چانسز خاصے کم ہوجائیں گے۔ 

ایرانی میزائل حملوں کی کامیابی کی بڑی وجہ کیا ہے؟

ایرانی میزائل حملوں کی کامیابی کی بڑی وجہ  یہ ہے کہ ایرانی میزائلوں میں ہائپر سانک میزائل بھی شامل ہیں جو آواز سے تقریباً 5 گنازیادہ رفتار کے ساتھ سفر کرتے ہیں اور اپنے ہدف کی جانب یہ سیدھے راستے پر بڑھنے کے بجائے گلائیڈ کرتے ہوئے جاتے ہیں جس سے دوران سفرکسی خاص وقت میں اس کے مقام کا تعین کرنا ممکن نہیں ہوتا جس کی وجہ سے یہ میزائل اپنے ہدف پر گرتے ہیں۔ 

اسرائیل ایران جنگ کی تازہ ترین صورتحال جانیے

اسرائیل نے غزہ کی جنگ کے بعد امریکا سے درآمد کردہ دیگر میزائل دفاعی نظاموں کو بھی اپنی دفاعی لائن کا حصہ بنایا ہے جن میں پیٹریاٹ میزائل نظام بھی شامل ہے۔ اس کے علاوہ امریکا نے حال ہی میں ایک طاقتور طیارہ شکن لیزرگن بھی اسرائیل کو دی ہے جو فضا میں اڑ کر آنے والے کسی بھی طیارے، ڈرون یا میزائل کو راستے میں ہی جلا کر تباہ کرنے کی صلاحیت رکھتی ہے البتہ جب میزائل غول کی صورت میں حملہ آور ہوتے ہیں تو یہ نظام کسی ایک ہی میزائل کو نشانے پر رکھ سکتا ہے ، یہی صورت ڈرون حملوں کی صورت میں بھی پیش آتی ہے۔