17 جون ، 2025 
ایران نے تل ابیب اور حیفہ پر میزائل و ڈرونز داغ دیے
17 جون ، 2025
ایران نے ایک بار پھر اسرائیل پر حملہ کرتے ہوئے میزائل و ڈرونز داغ دیے۔
ایرانی ٹی وی کے مطابق تل ابیب اور حیفہ پر میزائل و ڈرونز سے حملہ کیاگیا ہے۔
ایرانی سرکاری ٹی وی کا کہنا ہے کہ پاسداران انقلاب کی ایرو اسپیس فورس نے فوج کے ساتھ مل کر اسرائیل پر مشترکہ میزائل اور ڈرون حملہ کیا ہے۔
ایرانی میڈیا کے مطابق بیلسٹک میزائل سے اسرائیل کےفوجی اڈے پر بھی حملہ کیا گیا ،فوجی اڈے سے اسرائیل نے پیر کو ایرانی ٹی وی کے دفتر پر حملہ کیا تھا۔
ایرانی حملےکے بعد حیفہ ریفائنری کی پیداوار مکمل رک گئی جبکہ حملے میں 3 ملازمین ہلاک ہوئے ہیں۔
پاسداران انقلاب کے ترجمان جنرل علی محمد نے کہا کہ ہم دشمن کو ایک لمحہ کیلئے بھی امن میسر نہیں ہونے دیں گے۔ تازہ حملہ تباہ کن طاقت کے ذریعے کیا گیا ہے۔
جنرل علی محمد نے کہا کہ آپریشن وعدہ صادق سوم کی یہ نو ویں لہر ہے جو صبح تک جاری رہے گی۔
اس سے قبل ایرانی سپریم نیشنل سکیورٹی کونسل نے کہا تھا کہ آج کی رات کو اسرائیل کے لیے دن بنا دیں گے۔
ایرانی میڈیا کے مطابق اسرائیلی جارحیت نے ایران کو مجبور کردیا ہے کہ وہ اپنی قوم اور ملک کے دفاع میں یہ حملے جار ی رکھے اور صیہونی مجرموں پر کاری ضرب لگائے۔
ایرانی میڈیا کا کہنا ہے کہ آپریشن وعدہ صادق سوم کے تحت تازہ حملے ان مقبوضہ فلسطینی علاقوں پر کیے گئے ہیں جو اسرائیل کے زیر تسلط ہیں۔
تازہ حملوں سے اسرائیل میں نقصان کی فوری طور پر تفصیلات سامنے نہیں آسکیں۔اس سے پہلے ایران نے اسرائیل کا ایک اور ایف تھرٹی فائیو مار گرانے کا بھی دعوی کیا تھا۔
یاد رہے کہ جمعہ سے اب تک ایرانی میزائل حملوں میں 24اسرائیلی ہلاک اور 600 زخمی ہو چکے ہیں۔
