03 جون ، 2013 
اسپیکر و ڈپٹی اسپیکر قومی اسمبلی کا انتخاب، پیپلز پارٹی کے امیدوار دستبردار
03 جون ، 2013
اسلام آباد… قومی اسمبلی کے نئے اسپیکر اور ڈپٹی اسپیکر کا انتخاب آج ہوگا، پیپلز پارٹی کی جانب سے اسپیکر اور ڈپٹی اسپیکرکے کاغذات نامزدگی واپس لیے جانے کے بعد مسلم لیگ ن، تحریک انصاف اور متحدہ قومی موومنٹ کے امیدوار میدان میں ہیں۔ اسپیکر قومی اسمبلی کیلئے ایاز صادق اور ڈپٹی ا سپیکر کے لئے مرتضیٰ جاوید عباسی مسلم لیگ ن کے امیدوار ہیں۔ تحریک انصاف نے اسپیکر کے لئے شہریار آفریدی اور ڈپٹی اسپیکر کے لئے منزہ حسن کو میدان میں اتارا ہے جبکہ ایس اقبال قادری کو ایم کیو ایم نے اسپیکر اور کشور زہرہ کو ڈپٹی اسپیکر کے لئے نامزد کیا ہے۔اسپیکر قومی اسمبلی فہمیدہ مرزا اجلاس کی صدارت کریں گی۔ تمام سب کے کاغذات نامزدگی منظور کر لئے گئے، دونوں عہدوں کے لئے انتخاب الگ الگ اور خفیہ رائے شماری کے ذریعے ہوگا۔ انتخابی عمل شروع ہونے سے قبل کوئی بھی امیدوار اپنے کاغذات نامزدگی واپس لے سکتا ہے۔
