لندن…متحدہ قومی موومنٹ کے قائد الطاف حسین نے کراچی میں ایم کیوایم کے کارکنوں کی نسل کشی ، سرکاری حراست میں کارکنوں کی گمشدگی اور بھتہ خوری کے خلاف کراچی سمیت سندھ بھر میں کامیاب اورپرامن یوم سوگ منانے اور ہرقسم کی سرگرمیاں معطل رکھنے پر تاجروں ، صنعتکاروں، ٹرانسپورٹرز، محنت کشوں اورزندگی کے دیگر شعبوں سے تعلق رکھنے والے افراد کو زبردست خراج تحسین پیش کرتے ہوئے کہاہے کہ سندھ بھر میں کامیاب یوم سوگ اور ملک بھر میں احتجاجی مظاہرے ایم کیوایم کے کارکنان کی نسل کشی کے خلاف عوامی ردعمل کا منہ بولتا ثبوت ہے ۔ ایک بیان میں انھوں نے کہاکہ ایم کیوایم کے کارکنوں کی نسل کشی، دہشت گردی، سرکاری حراست میں بے گناہ کارکنان وہمدردوں کی گمشدگی اور سرکاری سرپرستی میں جرائم پیشہ دہشت گردوں کی بھتہ خوری کے خلاف پرامن یوم سوگ کی اپیل پرسندھ بھرکے تاجروں ، صنعتکاروں ، ٹرانسپورٹرزاور عوام نے مثالی اتحاد کامظاہرہ کیا اورایم کیوایم کے شہداء کے لواحقین سے یکجہتی کااظہار کرتے ہوئے یوم سوگ کوکامیاب بنایا ہے جس پر صوبہ سندھ کا ایک ایک حق پرست زبردست خراج تحسین کا مستحق ہے ۔جناب الطاف حسین نے کہاکہ سندھ بھر کے تاجروں ، صنعتکاروں، دکانداروں ، ٹرانسپورٹرزاور زندگی کے دیگر شعبوں سے تعلق رکھنے والے عوام نے ایم کیوایم کے کارکنان کی نسل کشی اور سرکاری سرپرستی میں دہشت گردی ،قتل وغارتگری اور بھتہ خوری کے خلاف اتحاد ویکجہتی کا مظاہرہ کرکے سفاک دہشت گردوں اور ان کے سرپرستوں پر واضح کردیا ہے کہ قتل وغارتگری اور دہشت گردی کے ذریعہ نہ تو حق پرست عوام کے حوصلے پست کئے جاسکتے ہیں اورنہ ہی انہیں حق پرستی کی جدوجہد سے باز رکھاجاسکتا ہے ۔ الطاف حسین نے مختصر وقت میں رابطہ کمیٹی ، نوتشکیل کردہ کے ٹی سی ، دیگر شعبہ جات کے ارکان ، زونوں، سیکٹروں اوریونٹوں کے ذمہ داران اورکارکنان کو بھی کامیاب یوم سوگ منانے پر زبردست خراج تحسین پیش کیا۔ انہوں نے حق پرست شہداء کے لواحقین سے ایک مرتبہ پھر دلی تعزیت کا اظہارکرتے ہوئے دعا کی کہ اللہ تعالیٰ شہداء کو جنت الفردوس میں اعلیٰ سے اعلیٰ مقام عطافرمائے اور سوگوارلواحقین کو یہ صدمہ عظیم برداشت کرنے کی ہمت عطاکرے۔(آمین)۔دریں اثناء الطاف حسین نے ٹریفک حادثے میں جیو ٹی وی کے سینئر پینل پروڈیوسر کاظم حیدرکے انتقال پر گہرے دکھ اور افسوس کااظہار کیا ہے ۔ ایک تعزیتی بیان میں جناب الطا ف حسین نے مرحوم کے سوگوارلواحقین سے دلی تعزیت وہمدردی کااظہارکرتے ہوئے انہیں صبر کی تلقین کی ،انھوں نے کہاکہ مجھ سمیت تمام کارکنان سوگوارلواحقین کے غم میں برابر کے شریک ہیں۔ الطاف حسین نے دعا کی کہ اللہ تعالیٰ کاظم حیدرمرحوم کو جنت الفردوس میں اعلیٰ مقام عطا فرمائے اور سوگوارلواحقین کو یہ صدمہ برداشت کرنے کا حوصلہ دے ۔(آمین)۔علاوہ ازیں الطاف حسین نے مسلح دہشت گردوں کی فائرنگ سے ناظم آباد یونٹ 183کے ہمدرد سکندر وہرہ کے بہیمانہ قتل کی سخت ترین الفاظ مذمت کی ہے اوراسے کھلی بربریت قرار دیا ہے ۔ ایک تعزیتی بیان میں انہوں نے شہداء کے لواحقین سے دلی وہمدردی کااظہار کرتے ہوئے کہاکہ دکھ کی اس گھڑی میں مجھ سمیت تمام کارکنان آپ کے غم میں برابر کے شریک ہیں ۔ انہوں نے مطالبہ کیا کہ سکندروہرہ شہید کے سفاک قاتلوں کو فی الفور گرفتار کیاجائے ۔الطاف حسین نے دعا کی کہ اللہ تعالیٰ سکندر ووہرہ شہید کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ (آمین)۔