پشاور… پشاورکے نواحی علاقے بڈھ بیرمیں خودکش دھماکے میں جاں بحق والوں کی تعداد سترہ ہوگئی ہے ۔ دوسری جانب جائے وقوعہ سے ملنے والی تباہ شدہ موٹرسائیکل اورگاڑی کے مالکان کا پتہ چل گیا ہے۔ لیڈی ریڈنگ ہسپتال انتظامیہ کے مطابق بڈھ بیر خودکش حملے کے مزید دو زخمی ہسپتال میں دم توڑ گئے۔ان میں پندرہ سالہ نوید اور غلام سرور شامل ہی ہسپتال میں اس وقت بھی دھماکے کے بیس زخمی زیر علاج ہیں جن میں سے ایک کی حالت تشویشناک ہے۔دوسری جانب دھماکے کی تحقیقات کے لئے ایس ایس پی انوسٹی گیشن کی سربراہی میں ٹیم تشکیل دیدی گئی ہے جس میں ایس پی ،ڈی ایس پی رولر سرکل اورپی آئی اوبڈھ بیر شامل ہیں۔خفیہ ادارے کی رپورٹ پرتحریک طالبان درہ آدم خیل کے خلاف ایف آئی آر درج کرلی گئی ہے۔جائے وقوعہ پردھماکے کے نتیجے میں مکمل طورپرتباہ ہونے والی موٹرسائیکل اورایک مشکوک گاڑی کے مالکان کا پتہ چلالیاگیاہے تاہم دونوں کے مالکان علاقے کے باشندے ہیں جوجنازے میں شرکت کے لئے آئے تھے۔ جائے وقوعہ سے شواہد اکھٹے کرنے کاکام مکمل کرلیاگیاہے اورخود کش حملہ آور کے جسمانی اعضاء ڈی این اے ٹیسٹ کے لئے اسلام آباد بھجوادیے گئے ہیں ۔