لندن… متحدہ قومی موومنٹ کے قائدالطاف حسین نے ایم کیوایم کے رکن قومی اسمبلی اورسینئر رکن پارلیمنٹ نبیل گبول کے خلاف قتل کا مقدمہ درج کیے جانے کوکھلی سیاسی انتقامی کارروائی قراردیاہے۔ ایک بیان میں الطاف حسین نے کہاکہ چنددن پہلے متحدہ کے سابق رکن سندھ اسمبلی ندیم ہاشمی پر پولیس اہل کاروں کے قتل کاجھوٹا مقدمہ قائم کیاگیاتھامگران کے خلاف الزام ثابت نہ ہوسکا۔اب ایم کیوایم کے رکن قومی اسمبلی نبیل گبول پر لیاری میں ہونے والے ایک قتل کامقدمہ درج کیاگیاہے جبکہ وہ گزشتہ کئی روزسے قومی اسمبلی کے اجلاس میں شرکت کی غرض سے اسلام آبادمیں مقیم ہیں۔اس مقدمے سے صاف ظاہر ہوتاہے کہ حکومت سندھ ایم کیوایم کے خلا ف انتقامی کارروائیاں کررہی ہے۔ انھوں نے مطالبہ کیاکہ نبیل گبول کے خلاف قتل کامقدمہ واپس لیاجائے اورایم کیوایم کے خلاف انتقامی کارروائیوں کا سلسلہ بندکیاجائے۔ متحدہ قومی موومنٹ کی رابطہ کمیٹی نے بھی لیاری گینگ وار کے مرکزی کردار ظفر بلوچ کے قتل کا مقدمہ حق پرست رکن قومی اسمبلی نبیل گبول کے خلاف درج کرنے کی شدید الفاظ میں مذمت کی ہے اورجھوٹے مقدمے کوایم کیوایم کے خلاف سیاسی انتقامی کارروائیوں کا تسلسل قراردیا ہے۔