کراچی…کراچی میں آج کل جامعات کی بسیں لوٹنے کی وارداتوں میں اضافہ دیکھنے میں آرہا ہے جس کے باعث طلباء میں تشویش اور خو ف پایا جاتا ہے، بد امنی کے شکار شہر کراچی میں اب طلباء بھی محفوظ نہیں، جانتے ہیں۔ آج صبح ناظم آباد نمبر 7 میں ایک اسکول وین کو ڈا کووں نے لوٹ لیا۔ یہ کوئی پہلی واردات نہیں اس سے قبل تین جامعات کی بسیں بھی ایسی ہی لوٹ مار کا شکار ہوئی، 3 ستمبر کو جامعہ کراچی کے پوائنٹ کو بنارس کے قریب مسلح افرادنے لوٹا اور طلباء سے ان کی سیمسٹر فیسیں ، موبائل فونز چھین کر فرار ہوگئے طلباء کے احتجاج کرنے کے بعد، واقعے کی رپورٹ پیر آباد تھانے میں درج کردی گئی تھی۔ اسی ماہ میں 28 ستمبر کو جناح یونیورسٹی برائے خواتین کی وین کو جامعہ کراچی کے قریب چار مسلح افراد نے لوٹا اور لڑکیوں سے نقدی، موبائل فونز لیکر چلتے بنے، جس پر لڑکیوں نے احتجاج بھی کیا۔اس کے بعد 4 اکتوبر کو ناظم آباد نمبر 1 سے گزرنے والے این ای ڈی یونیورسٹی کے پوائنٹ کو واردات کے لئے روکا گیا اور اس بار پھر مسلح افراد نے طلباء سے لوٹ مار کی اور فرار ہوگئے۔طالب علموں کا کہنا ہے کہ ایسے حالات میں حصول تعلیم کے لئے نکلنے والے خوف کا شکار ہیں کہ قانون نافذ کرنے والوں کی جانب سے انھیں کوئی تحفظ حاصل نہیں بلکہ اب ایسی وارداتیں آئے دن کا معمول بن گئی ہیں۔