کراچی…محمد رفیق مانگٹ…برطانیہ کے اسپتالوں میں ہر تیسر ا کنسلٹنٹ غیرملکی ہے ،برطانیہ میں خدمات انجام دینے والے 108 ممالک کے طبی کنسلٹنٹس میں پاکستان دوسرے نمبر پر ہیں۔برطانوی اسپتالوں میں 904 پاکستانی کنسلٹنٹس خدمات انجام دے رہے ہیں جو بھارت کے بعد سب زیادہ تعداد میں ہیں۔برطانوی اخبار ”دی میل“ کے مطابق برطانیہ میں ہرتین اسپتال کنسلٹنٹس میں سے ایک بیرون ملک سے تربیت یافتہ ہے۔جب کہ ایک دہائی قبل چار میں سے ایک کنسلٹنٹ غیر ملکی تھا۔برطانوی محکمہ صحت غیر ملکی طبی ماہرین پر انحصار کر رہا ہے۔برطانیہ کے ہسپتالوں میں کم از کم 108 ممالک کا سینئر طبی عملہ اپنی خدمات انجام دے رہا ہے۔زبان کے مسائل اور ناقص تربیت مریضوں کو خطرے سے دوچار کرسکتی ہے۔ ستمبر 2002 میں این ایچ ایس کے 26408کنسلٹنٹس میں سے6213کا تعلق بیرون ممالک سے تھا جو مجموعی تناسب کا 23.5فی صد تھا لیکن دس سال بعد برطانوی سرکاری اسپتالوں میں کل39409کنسلٹنٹس میں سے 13208 غیر ملکی تربیت یافتہ ہیں جو33.5فی صد ہے ایک پارلیمانی سوال میں برطانوی وزیر صحت ایرل ہوو نے انکشاف کیا کہ برطانیہ میں غیر ملکی کنسلٹنٹس میں بھارت سر فہرست ہے ہر آٹھ میں سے ایک بھارتی ہے اور مجموعی بھارتی کنسلٹنٹس کی تعداد5122ہے جب کہ دوسرے نمبر پر پاکستانی ہیں جن کی مجموعی تعداد904ہیں اور تیسرے پر آئیرلینڈ ہے جن کے کنسلٹنٹس کی تعداد848ہے۔برطانیہ میں سرفہرست 15 ممالک کے کنسلٹنٹس میں بھارت،پاکستان،آئرلینڈ،جنوبی افریقا،نائجیریا،مصر،جرمنی،عراق،سری لنکا،آسٹریلیا،اٹلی،اسپین،یونان،پولینڈ اور ویسٹ انڈیز ہے۔