شانگلہ…شانگلہ میں مسلم لیگ ن کے رہنما امیر مقام پر بم حملے میں جاں بحق ہونے والے تین اہلکاروں کی نماز جنازہ ادا کردی گئی۔ بم حملوں کا مقدمہ تین افراد کے خلاف درج کرلیا گیا۔ پاکستان مسلم لیگ ن کے سینئر نائب صدر اوروزیراعظم پاکستان کے مشیر انجینئر امیرمقام اتوارکوایک جرگے میں شرکت کیلئے شانگلہ کے علاقے مارتونگ پہنچے۔ جرگے میں فریقین کے درمیان صلح صفائی کے بعدوہ واپس اپنے گھرپورن جارہے تھے اورمارتونگ سے نکلے ہی تھے کہ علاقہ ایک کے بعد ایک دو دھماکوں سے گونج اٹھا۔ دھماکوں میں امیر مقام کے سیکیورٹی اسکواڈ میں شامل گاڑی مکمل طور پر تباہ ہوگئی اور اس میں سوار تین پولیس اہلکارلیاقت،فضل اور آصف رضا،ڈرائیورجعفراورملازم جواد سمیت 6 افراد جاں بحق ہوگئے تاہم امیرمقام محفوظ رہے۔جاں بحق اہلکاروں کی نماز جنازہ پولیس لائن سوات میں ادا کی گئی۔اس موقع پر امیرمقام کا کہنا تھا کہ طالبان سے مذاکرات سب کی خواہش ہے،لیکن ہاتھ پر ہاتھ دھر کر بھی نہیں بیٹھا جائے گا۔ دھماکوں کا مقدمہ تین ملزمان زین العابدین ،عمر خان اور حبیب مالک کے خلاف درج کرلیا گیا۔پولیس کے مطابق ملزمان کا تعلق شانگلہ کے گاوٴں کابل گرام سے ہے اور وہ دہشت گردی کی متعدد وارداتوں میں مطلوب ہیں۔