مظفر گڑھ…مظفر گڑھ کی تحصیل کوٹ ادو میں رقبہ کے تنازع پر دوگروپوں کی فائرنگ کے نتیجے میں ایک شخص جاں بحق ہو گیا۔مقتول کے لواحقین نے قتل کا الزام سابق گورنر پنجاب ملک غلام مصطفی کھر کے بیٹے بلال کھرپر عائد کیا ہے۔کوٹ ادو کے علاقہ کھر غربی میں سابق گورنر پنجاب ملک غلام مصطفی کھر کے چھوٹے بھائی سابق ممبر قومی اسمبلی مرتضیٰ کھر اور دلدا ر نامی شخص میں زمین کا تنازع تھا۔ آج فصل کاٹنے پر دونوں گروپوں میں تلخ کلامی کے بعد بات بڑھ گئی اور مر تضیٰ کھر نے سابق ممبر صوبائی اسمبلی بلال کھر کو بھی بلا لیا،جس کے بعد فائرنگ کے نتیجے میں امجد نامی شخص جاں بحق ہو گیا۔مقتول کے والد دلدار نے الزام عائد کیا ہے کہ فائرنگ سا بق گورنر پنجاب ملک غلام مصطفی کھر کے بیٹے بلال کھر نے کی تھی جس کے نتیجے میں اس کا بیٹا جاں بحق ہوا ،واقعہ کے بعد لواحقین نے لاش جی ٹی روڈ پر رکھ کر احتجاج کیا۔ایم این اے جمشید دستی بھی احتجاج میں شامل ہوگئے ۔ابھی تک واقعہ کا مقدمہ درج نہیں کیا جا سکا۔بلال کھر کے والد غلام مصطفی کھر کے مطابق تلخ کلامی ضرور ہوئی تھی جس کے بعد مرتضیٰ کھر اور بلال کھر نے فائرنگ بھی کی تھی مگر مخالف پارٹی نے ان سے ہتھیار چھین لیے جس پر وہ واپس آگئے تھے۔انھوں نے کہا کہ ان کے بیٹے یا بھائی نے کسی کو قتل نہیں کیا۔