نئی دہلی......اسرائیلی جارحیت کے خلاف بھارت میں احتجاج کیا جارہا ہے۔ مسلم کمیونیٹی بھارت میں اسرائیلی اور امریکی مصنوعات کا بائیکاٹ کرکے اپنا احتجاج رکارڈ کروارہی ہے ۔ بھارتی ریاست مدھیا پردیش کے لوگ ، فلسطینی شہر غزہ کے مظلوموں کے حق میں سڑکوں پر آگئے ۔ ہاتھوں میں اسرائیلی بربریت کے خلاف بینر اٹھائے شرکا نے اسرائیلی جارحیت کی پرزور مذمت کرتے ہوئے نعرے لگائے اور جنگ بندی کا مطالبہ کیا۔ شرکائ کا کہنا تھا کہ غزہ میں جاری اسرائیلی حملوں کے خلاف یاد داشت مدھیا پردیش کے وزیر اعلی کو پیش کی جائے گی۔ احتجاج میں شریک مسلم رہنما نے اس بات پر زور دیا کہ غزہ پر اسرائیل کے وحشیانہ حملوں اور اس کے حمایتی امریکا کے خلاف احتجاج کا سب سے موثر طریقہ اسرائیلی مصنوعات کا بائیکاٹ ہے اور اب ممبئ کے بھنڈی بازار میں اس پر مکمل عمل ہورہا ہے جہاں ریسٹورنٹس اورفاسٹ فوڈ کے کاروبار سے منسلک مسلم برادری نے امریکی مشروبات کوکا کولا اور پیپسی فروخت کرنے سے انکار کردیاہے، گاہکوں کو اب فریش جوس اور زیرے کا پانی پیش کیا جارہا ہے،مالکان کا کہنا ہے کہ یہ قدم واشنگٹن کی جانب سے تل ابیب کی بے جا حمایت کےخلاف اٹھایاگیا ہے۔مدھیہ پردیش اور ممبئ میں مسلم کمیونیٹی کی غزہ کے مظلوموں کے حق میں یہ احتجاجی کاوشیں اسرائیلی حملوں کو روک سکیں یا نہیں ، غم سے چور فلسطینیوں کی ہمت ضرور بڑھائیں گی ۔