کراچی......متحدہ قومی موومنٹ کی رابطہ کمیٹی نے کہا ہے کہ دنیا کے بیشتر ممالک نے خواندگی کی شرح بڑھا کر اپنے آپ کو ترقی و خوشحالی کی طرف نہ صرف گامزن کیا ہے بلکہ اپنے درمیان سے ناخواندگی کا خاتمہ کرکے مہذب معاشروں کو تشکیل دیا ہے ۔ عالمی یوم خواندگی کے موقع پر ایک بیان میں رابطہ کمیٹی نے کہاکہ پاکستان میں بد قسمتی سے خواندگی کی شرح بڑھانے کیلئے مثبت اقدامات اور حکمت عملی اختیار نہیں کی جارہی ہے جس کے باعث ہر گزرتے دن کے ساتھ ناخواندگی کی شرح میں اضافہ ہورہا ہے اور یہ صورتحال کسی طور پر بھی پاکستان کے روشن مستقبل کی نشاندہی نہیں کرتی ہے ۔ رابطہ کمیٹی نے کہاکہ جن ممالک نے ناخواندگی کو اپنے درمیان سے ختم کیا ،تعلیم و تربیت میں جدت اختیار کی اور اپنے آپ کودنیا کے ترقی یافتہ ممالک سے ہم آہنگ کیا وہ ممالک آج نہ صرف مستحکم ہیں بلکہ دنیا میں باوقار مقام بھی رکھتے ہیں ۔ رابطہ کمیٹی نے مزید کہا کہ پاکستان میں ناخواندگی کا اندازہ اس بات سے لگایا جاسکتا ہے کہ کئی اسکول اور تعلیمی ادارے ایسے ہیں جو صرف سرکاری کاغذوں تک ہی محدود ہیںاور انہیں وڈیروں ، جاگیرداروں اور سرداروں نے اصطبل بنایا ہوا ہے جس کی جتنی بھی مذمت کی جائے کم ہے ۔ رابطہ کمیٹی نے کہاکہ وڈیرانہ اور جاگیردارانہ نظام پاکستان میں ناخواندگی کی سب سے بڑی وجہ ہے اسی نظام کے پروردہ عناصر اپنے آپ کو طاقتور رکھنے کیلئے لوگوں کو علم کے حصول سے نہ صرف روکتے ہیں بلکہ بعض مقامات پر علم کا حصول اور تعلیم و تربیت میں دلچسپی تک لینا جرم بنا دیا گیا ہے ۔رابطہ کمیٹی نے کہاکہ پاکستان میں اگر اسکولوں اور دیگرتعلیمی اداروںکے ساتھ یہی سلوک روا رکھا گیا اور علم دوستی اور تعلیم کو فروغ دینے کیلئے عملی اور مثبت اقدامات نہیں کئے گئے توناخواندگی کی شرح بڑھ کر عروج پر پہنچ جائے گی جو دنیا بھر میں پاکستان کیلئے بدنامی اور رسوائی کا باعث بنے گی ۔ رابطہ کمیٹی نے صدر مملکت ممنون حسین ، وزیراعظم نواز شریف اور چاروںصوبوںکے وزیر تعلیم سے مطالبہ کیا کہ پاکستان میں ناخواندگی کی شرح کو ختم کرنے کیلئے فی الفور مثبت اصلاحات کی جائیں،فرسودہ جاگیردارانہ نظام ، بے روزگاری اور غربت کا خاتمہ کیاجائے تاکہ لوگوں کوحصول علم ، تعلیم وتربیت کی جانب دلجمعی اور خلوص نیت کے ساتھ راغب کیا جاسکے ۔دریں اثنا متحدہ رابطہ کمیٹی نے مسلح دہشت گردوں کی فائرنگ سے ایم کیوایم نیو کراچی سیکٹر یونٹ 140-Bکے کارکن آفتاب اعظمیٰ کے بہیمانہ قتل کی سخت ترین الفاظ میں مذمت کی ہے اورسفاکانہ قتل کی اس واردات کو شہرمیں جرائم پیشہ اور دہشت گرد عناصر کو حاصل کھلی چھوٹ کا شاخسانہ قرار دیا ہے ۔ رابطہ کمیٹی نے سوگوار لواحقین سے دلی تعزیت وہمدردی کااظہار کرتے ہوئےدعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ رابطہ کمیٹی نے وزیراعظم نوا زشریف ، وزیرداخلہ چوہدری نثار علی ، گورنراور وزیر اعلیٰ سندھ سے مطالبہ کیا کہ قتل میں ملوث سفاک دہشت گردوں کو فی الفور گرفتارکرکے قرار واقعی سزا دی جائے اور کارکنان کے قتل کی تسلسل کے ساتھ وارداتوں کے ذریعے ایم کیوایم کو دیوار سے لگانے اور اس کے جمہوری ، سیاسی اور اخلاقی حقوق کو پامال کرنے کا سلسلہ بندکرایاجائے ۔