ابوظبی........پاکستان اور نیوزی لینڈ کے درمیان پہلے کرکٹ ٹیسٹ میں کپتان مصباح الحق نے ٹاس جیت کر بیٹنگ کا فیصلہ کیا ہے۔ ابوظبی کے شیخ زید اسٹیڈیم میں کھیلے جارہے ٹیسٹ میں پاکستان نے وہی ٹیم برقرار رکھی ہے جس نے آسٹریلیا کے خلاف کامیابی حاصل کی تھی۔ مصباح الحق کا کہنا ہے کہ یہ نئی سیریز ہے، جسے جیتنے کیلئے پرعزم ہیں، آسٹریلیا کے خلاف کامیابی کے بعد کھلاڑیوں کامورال بلند ہے۔نیوزی لینڈ اور پاکستان کے درمیان اب تک20 دو طرفہ سیریز ہوچکی ہیں ، جس میں13 پاکستان نے جیتی ہیں جبکہ کیویز صرف دو ہی سیریز جیت سکے ۔ نیوزی لینڈ نے آخری مرتبہ1985 میں پاکستان سے ٹیسٹ سیریز جیتی تھی ۔50ٹیسٹ میں سے پاکستان نے23 جبکہ نیوزی لینڈ نے صرف 7 میں کامیابی حاصل کی، ان میں سے پانچ نیوزی لینڈ نے ہوم گراونڈ پر ہی جیتے ۔ دونوں کے درمیان آخری10 ٹیسٹ میں سے پاکستان نے 5 جیتے جبکہ 3 ڈرا ہوئے، 2 میں نیوزی لینڈ نے کامیابی حاصل کی ۔انفرادی کارکردگی میں پاکستان کے جاوید میانداد 18 میچز میں 1119رنز بناکر دونوں جانب سے ٹاپ اسکورر ہیں۔ قومی ٹیم کے موجودہ کوچ وقار یونس 70وکٹوں کے ساتھ لیڈنگ وکٹ ٹیکر ہیں۔