لاس اینجلس....... امریکی سی آئی اے کی منظوری سے تخلیق کی گئی اُسامہ بن لادن کی ڈول نیلامی کیلئے پیش کردی گئی۔ امریکی شہر لاس اینجلس میں سی آئی اے کی منظوری سے تخلیق کی گئی اُسامہ بن لادن کی ڈول نیلا می کیلئے پیش کردی گئی ہے۔نیٹ ڈی سینڈرز نامی آن لائن آکشن ہاؤس کے تحت نیلامی کیلئے پیش کی گئی یہ ڈول سی آئی اے کے خصوصی خفیہ آپریشن ڈیول آئز(انفلوئنس آپریشن)کیلئے معروف ہالی ووڈفلم جی آئی جو(G.I.JOE)کے ٹوائے میکر نے ڈیزائن کی تھی۔دو شکلوں والی اس ڈول میں جہاں اُسامہ بن لادن کو مکمل اسلامی سفید لباس اور پگڑی میں دکھایا گیا ہے، وہیں فیس ماسک پہنتے ہی یہ ڈول ڈیول کی شکل لے لیتی ہے۔امریکن سی آئی اے کی منظوری سے بننے والی اس ڈول کا مقصد افغان بچوں میں القاعدہ اور اُسامہ بن لادن کیخلاف نفرت بھرنا اور انہیں دہشت گرد گروپوں میں شمولیت سے روکنا تھا۔واضح رہے کہ اس ڈول کے صرف تین ماڈلز ہی تیار کیے گئے تھے جن میں دو تاحال سی آئی اے اور پینٹاگون کے پاس موجود ہیں جبکہ ایک آن لائن آکشن ہاؤس کے تحت فروخت کیلئے پیش کی گئی ہے۔ آکشن ہاؤس کی جانب سے اُسامہ بن لادن کی اس ڈول کی ابتدائی بولی2ہزار500ڈالر مقرر کی گئی ہے تاہم اسکی توقعات سے کئی گنا زیادہ قیمت پر فروخت ہونے کی اُمید ظاہر کی جارہی ہے۔