پشاور .....تعلیمی اداروں میں سیکیورٹی انتظامات میں بہتری کےلئے پولیس نے’’ ایس او ایس‘‘ سروس کاآغاز کردیا ہے۔ جس کے تحت کسی بھی تعلیمی ادارے میں ایمرجنسی کی صورت میں موبائل فون سے ایک کلک کرکے پولیس کو اطلاع دی جاسکتی ہے۔سانحہ آرمی پبلک سکول کے بعد خیبر پختونخوا کے تعلیمی اداروں میں سیکیورٹی انتظامات پر نظر ثانی کی گئی ہے۔ خیبر پختونخوا پولیس نے موبائل فون سافٹ ویئر تیار کیا ہے جو ہر تعلیمی ادارے کے سربراہ کے فون میں انسٹال کیا جائے گا۔ جس کے ذریعہ ایمرجنسی کی صورت میں ایک کلک کرکے پولیس اور ایمرجنسی اداروں کو اطلاع پہنچائی جاسکتی ہے۔اے آئی جی خیبر پختونخواہ میاں محمد آصف نے کہا کہ پولیس کیوک رسپانس فورس ہوگی۔ سروس کو ایس او ایس کال سروس کا نام دیاگیا ہے۔ الرٹ کال متعلقہ پولیس افسران اور ریسکیو اداروں کو پہنچ جائے گی۔ الرٹ کال کے ساتھ ایک ہنگامی پیغام بھی پولیس حکام کو موصول ہوگا۔ صوبائی صدر آل پاکستان پرائیویٹ سکولزمنیجمنٹ ایسوسی ایشن ڈاکٹرذاکرشاہ نےامید ظاہر کی کہ سروس اچھی ہوگی۔ابتدائی طور پر یہ سروس پشاور کے تعلیمی اداروں میں شروع کی جارہی ہے۔ سافٹ ویئر کے حصول کےلئے سرکاری اور نجی تعلیمی ادارو ں کورجسٹریشن فارمز جاری کردیئے گئے ہیں۔