کیلیفورنیا.....کنگ آف راک اینڈ رول ایلوس پریسلے کے 2 ذاتی طیارے نیلامی کیلئے پیش کردئیے گئے۔امریکی ریاست کیلیفورنیا کے شہر بیورلی ہلز میں معروف نیلام گھر جولینز آکشنزکے تحت کنگ آف راک اینڈ رول ایلوس پریسلے کے 2 ذاتی طیارے نیلامی کیلئے پیش کردئیے گئے ہیں۔لیزا میری اور ہاؤنڈ ڈاگ ٹو نامی یہ دونوں طیارے آنجہانی ایلوس پریسلے نے اپنے انتقال سے 2 سال قبل1975ء میں42سال کی عمر میں2لاکھ50ہزار اور9لاکھ ڈالر میں خریدے تھے۔کانویئر880جیٹ کو اپنی صاحبزادی لیزا میری کے نام پر جبکہ لاک ہیڈ جیٹ اسٹار کو ہاؤنڈ ڈاگ ٹو کا نام دیتے ہوئے ایلوس پریسلے نے ان دونوں طیاروں کا انٹیریئر خود ڈیزائن کیا تھاجس میں سونے کا پانی چڑھے نلکے،چمڑے کی سیٹس اور گلائیڈنگ واش بیسن سمیت دیگر پُرتعیش آسائشات کا خیال رکھا گیا ہے۔جولینز آکشنز کی انتظامیہ کی جانب سے ان دونوں طیاروں کی10ملین(1کروڑ)سے15ملین(ڈیڑھ کروڑ)ڈالر تک میں فروخت ہوجانے کی توقعات ظاہر کی گئیں جسکے لیے تمام خواہشمند افراد کی بولیاں بند لفافوں میں پیشگی حاصل کی جائینگی۔