کراچی … لیاری میں کلاکوٹ پولیس لائنز پر حملے کے دوران شرپسندوں سے مقابلے میں زخمی ایس ایچ او سول لائنز شہید ہوگئے جبکہ متعدد پولیس اہلکار زخمی ہیں، لیاری کے مختلف علاقوں میں جاں بحق افراد کی تعداد 4ہوگئی جبکہ 15 سے زائد افراد زخمی ہیں۔ کلاکوٹ پولیس لائنز پر شرپسندوں کی جانب سے دستی بموں اور راکٹ لانچروں سے حملہ کیا گیا جبکہ پولیس اور ملزمان کے درمیان شدید فائرنگ کا تبادلہ جاری ہے، نمائندہ جیو نیوز شعیب برنی کے مطابق کلاکوٹ پولیس لائنز کو شرپسندوں نے تین اطراف سے گھیر کر دستی بموں اور راکٹ لانچروں سے حملہ کیا گیا جبکہ پولیس اور ملزمان کے درمیان شدید فائرنگ کا سلسلہ جاری ہے، ملزمان سے مقابلے کے دوران ایس ایچ او سول لائنز سمیت 4 پولیس اہلکار زخمی ہوئے ہیں جبکہ ملزمان کے خلاف آپریشن میں بکتر بند گاڑیاں بھی استعمال کی جارہی ہیں۔ ذرائع کے مطابق ملزمان نے منصوبہ بندی کے تحت تین اطراف سے کلاکوٹ پولیس لائنز پر حملہ کیا، صورتحال انتہائی تشویشناک ہے، مسلسل فائرنگ کے ساتھ آر پی جی فائر اور دستی بم پھینکے جارہے ہیں، ملزمان کی بڑی تعداد نے پولیس لائنز کو تین اطراف سے گھیرے میں لے رکھا ہے ، دو بکتر بند گاڑیوں کے ٹائر برسٹ کردیئے گئے ہیں جبکہ دستی بموں سے حملے بھی کئے جارہے ہیں۔ زخمیوں کو ایمبولینسوں کے ذریعے سول اسپتال منتقل کیا جارہا ہے۔ نمائندہ کے مطابق پولیس اہلکار رہائشی علاقے میں داخل ہوگئے جبکہ ملزمان کی جانب سے شدید مزاحمت کا سامنا ہے، مسلح ملزمان رہائشی علاقوں میں چھپ کر اور گھروں کی کھڑیوں سے پولیس اہلکاروں پر فائرنگ کررہے ہیں۔دوسری جانب لیاری کے علاقے بہار کالونی میں دستی بم اور راکٹ حملوں میں 3 افراد زخمی ہوگئے جبکہ علی محمد محلہ میں دستی بم سے حملے میں خاتون زخمی ہوئی ہیں۔